76 წლის რუსი ქალი, რომელიც პუტინის რეჟიმს მარტო ებრძვის – ელენა ოსიპოვა მხატვარია. ის უკვე 20 წელია, რუსეთში პუტინის რეჟიმს აპროტესტებს. 76 წლის ელენა სანკტ-პეტერბურგის ცენტრალურ ქუჩებში ომის საწინააღმდეგო პლაკატებით გამოდის. ელენა ოსიპოვას “სანკტ-პეტერბურგის სინდისს” უწოდებენ. მას შემდეგ, რაც რუსეთმა უკრაინაში ომი დაიწყო, 76 წლის ელენა ოსიპოვამ პუტინის პოლიტიკა სხვადასხვა პლაკატით რამდენჯერმე გააპროტესტა. ოკუპანტი ქვეყნის პოლიციამ მისი დაკავებაც არ დააყოვნა, თუმცა ჯარიმის გადახდის შემდეგ გაათავისუფლეს. ოსიპოვა პირველად ჯერ კიდევ 27 თებერვალს, ომის დაწყებიდან მეოთხე დღეს გავიდა პლაკატით, რომელზეც თვალდახუჭული ჯარისკაცი ეხატა, დედა იარაღს ართმევს და ეუბნება “არ წახვიდე შვილო ამ ომში”. აქციის ერთადერთმა მონაწილემ წარწერას ასევე დაამატა: “ჯარისკაცო, დააგდე იარაღი, არ ისროლო და ნამდვილი გმირი იქნები”.
მხატვარი ელენა ოსიპოვა პირველად აქციაზე 2002 წელს გავიდა. ამის შემდეგ ჩეჩნეთის მეორე ომის დროს. როგორც თვითონ ჰყვება, ხალხს მაშინვე რომ დაეწყო გამოსვლა და პროტესტი, შესაძლოა, ყველაფერი სხვაგვარად ყოფილიყო.
“ასეთი მორჩილება მიკვირს. ახლა არ არის ის დრო, როცა დემონსტრაციის დროს თავში ესვრიან. ბევრი კარგი ადამიანია, ბევრი, ვისაც ესმის ყველაფერი, მაგრამ ისინი შეშინებულები არიან. მესმის, რომ ეშინიათ არ დაკარგონ სამსახური, ფული, თავისუფლება. მე დასაკარგი არაფერი მაქვს, ნებისმიერ მომენტში შემიძლია მოვკვდე, ” – ამბობს 76 წლის რუსი მხატვარი ელენა ოსიპოვა.
ელენა ოსიპოვა უკრაინის თავისუფლების მხარდაჭერისთვის პეტერბურგში 2017 წელსაც დააკავეს. აქცია უკრაინის დამოუკიდებლობის დღეს ეძღვნებოდა.
პეტერბურგში 24 აგვისტოს მიმდინარე აქციაზე, რომელიც უკრაინის დამოუკიდებლობის დღეს ეძღვნებოდა, აქციის 72 წლის მონაწილე დააკავეს. მხატვარ ელენა ოსიპოვას დაკავების მიზეზი მისი პლაკატი გახდა, წარწერით: “უკრაინა გვაპატიე! შენი და ჩვენი თავისუფლებისთვის”.
