ხონის მუნიციპალიტეტის სოფელ გორდში მოსახლეობამ გზა გადაკეტა. ისინი სოფლის მძიმე მდგომარეობას აპროტესტებენ და დახმარებას მოითხოვენ.
სოფელ გორდს არ მიეწოდება გაზი, სასმელი წყალი, მოუწესრიგებელია შიდა სასოფლო გზები, წლებია ვერ დასრულდა სკოლის რეაბილიტაცია, ბავშვები განათლებას კერძო სახლის შენობაში იღებენ.
მოსახლეობა აპროტესტებს “ოკაცეს კანიონთან” მისასვლელი გზის გაკეთებას, რადგან როგორც თავად ამბობენ ადგილობრივები უმუშევრები დარჩებიან. მათი თქმით “ოკაცეს კანიონზე” მოსახლეობის 90%, 70 ოჯახია დასაქმებული, გზის გაკეთების შემდეგ კი, აქ უკვე მაღალი გამავლობის ავტომობილები საჭირო აღარ იქნება. მოსახლეობა ალტერნატიული გზის მოწყობას მოითხოვს, საიდანაც ისინი შეძლებენ ტურისტები ასხის მთაზე, ონიორეს ჩანჩქერზე აიყვანონ და შემოსავლის ერთადერთი წყარო არ დაკარგონ .
მოსახლეობა ასევე ეწინააღმდეგება სოფელში კარიერზე ქვის მოპოვებითი სამუშაოების დაწყებას. როგორც ადგილობრივები ამბობენ კარიერზე სამუშაოებმა შესაძლოა ძირი გამოუთხარეს ზემოთ არსებულ კლდეს, ისინი მოითხოვენ კომპანიამ წარმოადგინოს გეოლოგების დასკვნა. ასევე ადგილობრივები ამბობენ რომ კარიერზე მომუშავე სატვირთო ავტომობილები სოფლის გზებს დააზიანებს.
როგორც “მეგა ტვ”-ს შპს “ჯალა”-ს დამფუძნებელმა და დირექტორმა ავთანდილ ჯალაღანიამ განუცხადა, მათ სოფელ გორდში, კახურას მიმდებარე ტერიტორიაზე მიიღეს კარიერზე ქვის მოპოვების ჩასატარებელი სამუშაოების ლიცენზია.
“ყველა წესის დაცვით ვაწარმოებთ სამუშაოებს. ამ ეტაპზე გვინდა მისასვლელი გზები დავამუშაოთ. ამ ეტაპზე არ ვაპირებთ მასობრივ მუშაობას. ყველაფერს გავაკეთებთ ყველა წესის დაცვით. მოსახლეობასაც მოვეხმარებით და ხელს შევუწყობთ. გზასაც შევინარჩუნბეთ და ბოლოს გზასაც გაკეთებულს დავტოვებთ. მე როგორც ვიცი გეოლოგების ჯგუფი მოსული იყო აქ და მოიკვლია ეს ადგილი. მანამდეც 2-3- წლის წინ იყო აქ კარიერი და არ დაქცეულა აქ ქვეყანა. გლეხებმაც ისარგებლა და ყველას ჭირდება აქ ქვა.” – განაცხადა ავთანდილ ჯალაღონიამ “მეგა ტვ”-თან საუბრისას.
არაერთი პრობლემის ფონზე გორდის მოსახლეობა კვლავ საპროტესტო აქციებს აანონსებს.
