„ევროპარლამენტის ისეთი რეზოლუციის შემდეგ, რომელიც დღეს დამტკიცდება, შეუძლებელია საქართველოს საპარლამენტო დელეგაციის მოწვევა და ასოცირების შეთანხმების სამთავრობო შეხვედრა,“ – ამის შესახებ ევროპარლამენტის „მწვანეთა პარტიის“ საპარლამენტო მრჩეველმა თამარ გუგულაშვილმა „პალიტრანიუსის“ გადაცემაში „360 გრადუსი“ განაცხადა.
როგორც გუგულაშვილი აღნიშნავს, ევროპარლამენტის რეზოლუციის პირველადი ვერსია მკაცრი გზავნილებით გამოირჩევა, მსგავსი რეზოლუციის მიღების შემთხვევაში კი საქართველოს ხელისუფლება იზოლაციაში მოექცევა.
„ევროპარლამენტის რეზოლუცია იქნება მკაცრი – ეს არის სრული იზოლაცია“
მისი განმარტებით, რეზოლუციის პირველადი ვერსიის ავტორები ევროკავშირის სხვადასხვა ქვეყნის მთავრობას წარმოადგენენ. გუგულაშვილის თქმით, აქვს ინფორმაცია, რომ ეს პირები მუშაობენ საკუთარ ქვეყნებთანაც, სანქციების ორმხრივი აღსრულებისთვის.
„ის დეპუტატები, რომლებიც დღეს არიან ევროპარლამენტში, ყველა წარმოადგენს მთავრობას სხვადასხვა ქვეყანაში. ეს ნიშნავს იმას, რომ ეს რეზოლუცია არ იქნება ცალკე იზოლირებულად და ისეთი ადამიანების მოწოდება, რომელსაც არ ითვალისწინებს მათი მთავრობები. ვიცი, ეს ადამიანები გააქტიურდნენ საკუთარ მთავრობებთან, რომ ორმხრივი სანქციების აღსრულებაზე იმუშაონ. ერთია, რას მოუწოდებენ ისინი ლიდერთა საბჭოს როგორც ერთიანობას, სადაც ორბანს ბერკეტი აქვს, მაგრამ მეორე არის ის, თუ რას მოუწოდებენ საკუთარ მთავრობას, სადაც რეზოლუციის ავტორებს ბერკეტები აქვთ, რადგან მათი პარტიაა ხელისუფლებაში“, – განაცხადა თამარ გუგულაშვილმა.
შეგახსენებთ, რომ 13 თებერვალს სტრასბურგში, ევროპარლამენტში კენჭს უყრიან რეზოლუციას, „საქართველოში პოლიტიკური სიტუაციის გაუარესების შესახებ“. კენჭისყრა თბილისის დროით 15:00-დან 17:00 საათამდე გაიმართება.
