,,სახელითა მამისათა და ძისათა და სულისა წმიდისათა, ჩვენთან არს ღმერთი
-არს და იყოს!
ღმერთმა დაგლოცოთ გაგახაროთ, სულიწმინდის მადლით აღგავსოთ. ყველას გილოცავთ ჩვენთვის ძალიან სასიხარულო დღეს! სტეფანე ხირსელი და სტეფანე პირველდიაკონი ჩვენთვის ძალიან ძვირფასია, საქართველოში, მაგრამ ქიზიყის ამ ლამაზ ადგილას უფრო განსაკუთრებით. მათი ლოცვა კურთხევა არ მოგკლებოდეთ არც თქვენ და არც სრულიად საქართველოს.
ღმერთს ყველა უყვარს, საქართველოც შეიყვარა და იცით, რომ ღვთისმშობელს ხვდა წილად, ექადაგა საქართველოში და გამოაგზავნა ანდრია პირველწოდებული. შემდეგ ვიცით, რომ ჩვენი განმანათლებელი არის წმ. ნინო.
ეს, ის პერიოდია, როდესაც ასურელი მამები ჩამოვიდნენ. მოწყალე უფალმა დაგვასაჩუქრა იმით, რომ იოანე ზედაზნელი თავის მოწაფეებთან ერთად ჩამობრძანდა და საქართველოში ახალი სულიერი აღმავლობა დაიწყო.
მას შემდეგ, იცით, ხან რომელი მტარვალი შემოიჭრებოდა, ხან ვინ დაგვიპყრობდა და ხან ვინ, მაგრამ ქართველ კაცს თავისუფლება არასოდეს დაუკარგავს. ქართველი ადამიანი ყოველთვის ცდილობდა, რომ ძლიერი ფესვები ჰქონოდა თავის სამშობლოში, ანუ საქართველოში.
და შევთხოვ უფალს, რომ ვინც წასულია საქართველოდან, ვინც გასულია, ღმერთმა ყველა, ვისაც სურვილი აქვს, აბსოლიტურად ყველა, მშვიდობიანად დააბრუნოს საქართველოში. ამაზე კარგ ქვეყანაში სად უნდა წავიდეთ? რაც არ უნდა შესაძლებლობები, ფულადი შესაძლებლობები გაგიჩნდეს, ალბათ მაშინ მოხდება ეს დაბრუნება, თუ ჩვენ ერთმანეთს ისე შევიყვარებთ, როგორც მოციქულებმა შეიყვარეს ერთმანეთი.
ქართველებს, რაც გვაკლია ურთიერთგატანაა. ქართველი ძალიან ნიჭიერია, ამიტომ ყველა ფიქრობს, რომ მხოლოდ თვითონ არის მართალი თავის აზრებში და ისე უნდა იცხოვროს , როგორც უნდა. ალბათ ერთად ცხოვრება უნდა ვისწავლოთ ქართველებმა და ვერც ერთი მტერი ვერ დაგვამარცხებს.
შეხედეთ აბა, დღეს როგორი სიტუაციაა. ჩვენს ირგვლიც ქვეყნები ავიღოთ. რუკას თუ შევხედავთ, ჩრდილოეთით ქვეყანა ომშია გახვეული და ვინც უშუალოდ გვესაზღვრება ხედავთ, როგორი სიტუაციებია, ღმერთმა ყველას მშვიდობა მისცეს და ჩვენც რაღაცას ხომ უნდა მივხვდეთ, ღმერთი გვიფარავს და სად გავრბივართ?
მე ძალიან მიხარია, როცა საქართველოს გარეთ წარმატებული ქართველები არიან, ისინი ძალიან ბევრ სიკეთეს აკეთებენ ყველასთვის, მაგრამ ბევრი ისეა წასული საკმაოდ რთულია მათი ცხოვრება. ხშირად დავდივარ უცხოეთში და ვიცი, ვინ როგორ ცხოვრობს და ღმერთმა ინებოს, რომ ჩვენი ქვეყნიდან არ გარბოდეს ხალხი.
ალბათ, ოჯახის ძლიერება, სკოლა…სამშობლოს სიყვარული უნდა ჩავუნერგოთ ბავშვებს. ჩემი თაობისათვის ძალიან რთულია, რომ ვუყურებ, ვერ გამიგია. მე როდესაც ჯარში წამიყვანეს, მაშინ იმპერია იყო. სიცხეებმა რომ მომცა, ვერაფრით დამიგდეს, ისეთი ნოსტალგია მქონდა, ვიდრე არ ჩამოვედი საქართველოში.
როგორია წახვიდე, წახვიდე და ეს ყვლაფერი დაკარგო, შენებთან ურთიერთობა დაკარგო. საქართველო არასდროს არ იყო დამპყრობელი და ჩვენ სხვანაირ ცხოვრებას ვართ მიჩვეულნი. დიდ იმპერიებში რომ მიდიხარ, იქ სხვა ვიღაცა ხდები. თან, ამ ბოლო დროს ძალიან მიხარია, რომ მეტ გაღიმებულ ადამიანს ვხვდები, თბილისშია, თუ სადაც არ უნდ წავიდე.
ბავშვები ჩვენი მომავალი, ეკლესიაში რომ მოდიან, თავიანთი სურვილით მოდიან, ეს არის ძალიან სასიხარულო. ძალიან მიხარია და თუნდაც ხმამაღლა საუბრობდნენ, ძალიან სასიხარულოა. აბა, გამოყრუებული ეკლესია რა სარგებლის მომტანი იქნება. ღმერთმა ჩვენი ახალგაზრდობა დალოცოს. ძლიერი ოჯახები უნდა გვქონდეს აუცილებლად, ძლიერი სკოლა და ეკლესია. ეს მთლიანი ჯაჭვია და ერთი სხეულია.
ერთად უნდა ვიყოთ და მასწავლებლებსაც ღირსეული ანაზღაურება რომ ექნებათ, სარბენი არ ექნებათ. შევარდნაძის დროიდან და მერე და მერე, არჩევნებზე დაარბენინებდნენ. დღეს, მიეცემათ საშუალება უშუალოდ ბავშვებს მივხედოთ და არ დაგვჭირდება ბავშვების სადმე ტარება. ძირითადი ცოდნა ბავშვებს სკოლამ უნდა მისცეს, თორემ აბა დააკვირდით, როგორ იზრდება შვილი, ჯერ სკოლაში წავა, მოვა სკოლიდან საჭმელს შეჭამს და გარბის რეპეტიტორთან, გაიზრდება და მერე მშობელი ვეღარ ცნობს, იგი ქვეყნიდანაც აუცილებლად გაიქცევა, იმიტომ რომ ჩვენ ვერ ვზრდით ჩვენს შვილს. სხვებს ვუზრდით ამ ნიჭიერ თაობას.
მერწმუნეთ, ქართველი კონკურენტუნარიანია. ნებისმიერ ადგილას წამყვან ადგილზე იქნება ყიველთვის. გავაკეთოთ ისე, რომ ერთმანეთს გავუფრთხილდეთ ქართველები. ჩვენს ქვეყანას ძალიან დიდი მომავალი აქვს. არ ვუსმინოთ, ვინც სხვანაირად ლაპარაკობს.
მერწმუნეთ, ხშირად დავდივარ უცხოეთში და იმათი უმაღლესი პირებიდან ვიცი დღეს რა განწყობაა. ჩამოვდივარ აქ ჩვენებს ვუსმენ … ერთმანეთს უნდა შევუნდოთ, მაგრამ უნდა შეგვეძლოს შენდობის თხოვნა ყველას, მეც თუ რამეს ვაშავებ ყოველთვის შენდობასაც ვითხოვ და პატიებასაც.
მე დავლოცავ იმ მოძღვრებს, რომლებიც უცხოეთში მოღვაწეობენ, დიდ საქმეს აკეთებენ და ღვთის სიტყვის გარეშე, ზიარების გარეშე, აღსარების არეშე არ ტოვებენ იქაურ ადამიანებს. დღეს, ჩვენთანაც არიან და ყველას ვუსურვებ წარმატებას და წარმატება ის იქნება, რომ ყოველი ქართველი, ვისაც დაბრუნება უნდა, საქართველოში მშვიდობიანად და ძლიერად დაგვიბრუნდება და ჩვენც შევქმნათ ისეთი პირობები, რომ აქეთკენ გამობორდნენ. მარტო უცხო ქვეყნის ეკონომიკას არ აძლიერებდნენ.
ღმეთმა დაგლოცოთ, ღმერთმა გაგახაროთ და შევთხოვ სტეფანე პირველდიაკონს, ჩვენს სტეფანე ხირსელს შევთხოვ, რომ შეგვეწიოს და მე მჯერა, რომ საქართველო ძალიან კარგად იქნება, მომავალი თაობა ძალიან ძლიერად იქნება, გავა 20-25 წელი და უნდა ჩაიბარონ ქვეყანა. იხარეთ ორთავ სოფელსა შინა.
ჩვენს პატრიარქს ვულოცავ, წმინდა სინოდს, ჩვენს დედა ეკლესიას, ყველა წევრს, მამებს, დედებს,თქვენ ყველას , მრევლს და ასევე საქართველოს ყველა მოქალაქეს, ვისაც უყვარს საქართველო და ვინც ქრისტიანია და ვინც ქრისტიანი არ არის, მაგრამ საქართველო უყვარს, ყველას ვულოცავ და ძლიერებას ვუსურვებ.
ყველას ჭეშმარიტებაში გვეცხოვროს, რაც მთავარია, როგორც სასულიერო პირი ყველას ვურჩევ, შეიცნოს ჭეშმარტება, ჭეშმარიტება გვაცხონებს თითოეულ ჩვენთაგანს.
ღმერთმა დაგლოცოთ, ღმერთმა გაგახაროთ, ერთმანეთზე ცუდი არ ვილაპარაკოთ და მოვეფეროთ ერთმანეთს!-განაცხადა მეუფე იაკობმა ხირსის მამათა მონასტერში.
ტროპარი: ჰკამკამებ უდაბნოსა, ნათობ ქართველთა უმეტეს მზისთუალისა, მამო მამათაო იოანე, მეოხ-იქმენ მათვის, რომელნი პატივს სცემენ დღესასწაულსა შენსა და განათლდებიან.
კონდაკი: ასურით გამო მნათობად ქართლისად გამოსჩნდი და ათორმეტთა მამათა მამად იჩინე, ხოლო მადლთა სულისა წმინდისათა გვიწყაროებ და სასწაულთა სიმრვალითა განგვაბრწყინვებ, მამო წმინდაო იოანე, მოეც მშვიდობაი მთავრობასა და მხედრობასა ჩუენსა მორწმუნესა და ერნი მადიდებელნი შენნი, იხსნენ განსაცდელთაგან.
