ქუთაისის ნიკეას დასახლებაში ისტორიული ნაგავსაყრელის რეაბილიტაცია ოთხი თვის განმავლობაში გაგრძელდება, ამის შესახევ “მეგა ტვ”-ს საქართველოს მყარი ნარჩენების მართვის კომპანიაში განუცხადეს. მათივე ინფორმაციით, ამჟამად მიმდინარეობს სამუშაოების პირველი ეტაპი, რომელიც თვის ბოლოს დასრულდება. სწორედ ამ პროცესს უკავშირდება ბოლო დღეებში გავრცელებული მძაფრი უსიამოვნო სუნი, რის გამოც ადგილობრივი მოსახლეობა დისკომფორტზე საუბრობს.
საქართველოს მყარი ნარჩენების მართვის კომპანია “მეგა ტვ”-ის კითხვებზე გამოგზავნილ პასუხში წერს, მიუხედავად იმისა, რომ რეაბილიტაცია ოთხ თვეს გასტანს, მოსახლეობისთვის ყველაზე შემაწუხებელი ეტაპი, თვის ბოლოს უნდა დასრულდეს. ამის შემდეგ სამუშაოები გაგრძელდება, თუმცა მათივე მტკიცებით დამატებით დისკომფორტს აღარ შექმნის. კომპანია განმარტავს რა ტიპის სარეაბილიტაციო სამუშაოები მიმდინარეობს ე.წ. ნიკეას ნაგავსაყრელზე და რა რისკები შეიძლებოდა შეექმნა პროეცესის გადავადებას. კომპანიის განმარტებით, მიმდინარე სამუშაოების მიზანი ნაგავსაყრელის უსაფრთხო ექსპლუატაციის გაგრძელება და გარემოზე ზემოქმედების შემცირებაა. მათი თქმით, რეაბილიტაციის გარეშე არსებული მდგომარეობა კიდევ უფრო გართულდებოდა.
“მყარი ნარჩენების მართვის კომპანიას ევალება არსებული, ძველი, ფაქტობრივად, ისტორიული ნაგავსაყრელების მართვა ნარჩენების განთავსების ახალი, თანამედროვე ტიპის ობიექტის აშენებამდე. შესაბამისად, არსებული ნაგავსაყრელები, პერიოდულად საჭიროებს რეაბილიტაციას, რაც ემსახურება ნაგავსაყრელის საციცოცხლო რესურსის გახანგრძლივებას. იმ შემთხვევაში, თუკი ნაგავსაყრელს არ ჩაუტარდება საჭირო სამუშაოები, ამან შეიძლება გამოიწვიოს მოსახლეობისა და მუნიციპალიტეტისთვის გაცილებით მძიმე შედეგები ნარჩენების მართვის კუთხით. რეაბილიტირებულ ნაგავსაყრელს ექსპლუატაციის ვადა აქვს, მაქსიმუმ, ორ წლამდე.
უსიამოვნო სუნის გავრცელების მიზეზს წარმოადგენს ნიკეას ისტორიული ნაგავსაყრელის რეაბილიტაცია. ამჟამად, მიმდინარეობს რეაბილიტაციის პირველი ეტაპი, რომელიც მოიცავს უშუალოდ ნარჩენების განთავსების უჯრედის ზედაპირის სისწორეში მოყვანას, ფორმირებას და მის გადაფარვას საიზოლაციო მასალით. იმისათვის, რომ სუნის გავრცელება მაქსიმალურად თავიდან იქნეს აცილებული, ზედაპირის გასწორების შემდეგ, მიმდინარეობს ფრაგმენტული გადაფარვა, თუმცა აღნიშნული პროცესი არ იძლევა უსიამოვნო სუნის სრულად შეკავების შესაძლებლობას.
სამშენებლო ხელშეკრულებას ხელი მოეწერა 11 მაისს. მშენებელი კომპანიის ობიექტზე შესვლა განხორციელდა იმავე დღეს. რეაბილიტაციის პერიოდი მოიცავს 4 თვეს. პირველი ეტაპი გულისხმობს, პოლიგონის ფორმირებასა და საიზოლაციო ფენით გადაფარვას, რაც იწვევს არასასიამოვნო სუნის გავრცელებას. აღნიშნული პროცესი დასრულდება მიმდინარე თვის ბოლოს, რაც შექმნილ დისკომფორტს აღმოფხვრის. შემდგომი ეტაპის სამუშაოები მოსახლეობისთვის დისკომფორტის შემქმნელი აღარ იქნება.
ძველი ნაგავსაყრელის რეაბილიტაცია გულისხმობს, რომ შემდგომი ექსპლუატაციის პერიოდში, მაქსიმალურად იქნეს დაცული გარემო დაბინძურებისგან, მათ შორის მინიმუმამდე იქნას დაყვანილი უსიამოვნო სუნის გავრცელება.” – ნათქვამია საქართველოს მყარი ნარჩენების მართვის კომპანია მიერ “მეგა ტვ”-თვის მოწერილ წერილში.
“მეგა ტვ” ასევე დაინტერესდა რამდენად შეესაბამება ნაგავსაყრელის მართვის მიმდინარე პროცესი გარემოსდაცვით და სანიტარულ ნორმებს, განსაკუთრებით უსიამოვნო სუნის კონტროლის მიმართულებით? ჩატარდა თუ არა ჰაერის ხარისხის/ემისიების მონიტორინგი ნიკეას ნაგავსაყრელის მიმდებარე ტერიტორიაზე და რა შედეგები აჩვენა?
“მაქსიმალურად დაცულია სანიტარული და გარემოს დაცვითი ნორმები, თუმცა რეაბილიტაციის პროცესი, თავისი შინაარსით, წარმოადგენს გარკვეული სახის დისკომფორტის შექმნის საფუძველს, რაც, ძირითადად, უსიამოვნო სუნის გავრცელებას უკავშირდება.
ყველა ნაგავსაყრელს კომპანია ოპერირებას უწევს შესაბამისობაში მოყვანის გეგმებში გაწერილი ვალდებულებებით. შესაბამისობაში მოყვანის გეგმა განსაზღვრავს ისტორიული ნაგავსაყრელების ოპერირების გეგმას. აქედან გამომდინარე, რეგულარულად ტარდება, როგორც ჰაერის, ასევე წყლის ხარისხის კონტროლი. რომელიც ნაგავსაყრელის ჩვეულებრივ სამუშაო რეჟიმში ყოველთვის შეესაბამება ნორმებს.” – აცხადებენ საქართველოს მყარი ნარჩენების მართვის კომპანიაში.
მაშინ, როცა მოსახლეობა არსებული პრობლემების მოგვარებას წლებია ელოდება, “მეგა ტვ” დაინტერესდა რა ეტაპზეა ახალი თანამედროვე ნაგავსაყრელის მოწყობის დაპირება, რომელიც მთავრობამ ჯერ კიდევ 2014 წელს გასცა. საქართველოს მყარი ნარჩენების მართვის კომპანიაში აცხადებენ რომ, პროექტი ჯერ კიდევ დაგეგმვის ეტაპზეა. ახალი ნაგავსაყრელის ოპერირებისთვის მზადყოფნა კი 2030 წლისთვის არის ნავარაუდევი.
“დღეისათვის, მიმდინარეობს ნარჩენების განთავსების თანამედროვე ტიპის ახალი ობიექტის მოსაწყობად ტერიტორიის შერჩევა, რისთვისაც აუცილებელია სხვადასხვა კვლევების ჩატარება. კვლევების შედეგების საფუძველზე, დაიწყება საპროექტო სამუშაოები. აღნიშნული პროექტი განხორციელდება სამი წლის განმავლობაში. 2026 წელს დაგეგმილია საკონსულტაციო კომპანიის დაქირავება, რომელიც ჩაატარებს კვლევებს და მოამზადებს პროექტს, რასაც დასჭირდება, დაახლოებით, ერთი წელი. 2028-2029 წლები იქნება ობიექტის მშენებლობის პერიოდი, 2030 წლისთვის თანამედროვე ტიპის ობიექტი მზად იქნება ოპერირებისთვის. ამასთან, ობიექტი აშენდება საერთაშორისო სტანდარტის შესაბამისად და გათვალისწინებული იქნება გადამუშავების კომპონენტი, რაც მნიშვნელოვნად შეამცირებს განსათავსებელი ნარჩენების რაოდენობას.” – განუცხადეს “მეგა ტვ”-ს საქართველოს მყარი ნარჩენების მართვის კომპანიაში.
ნიკეას ნაგავსაყრელი მრავალი წელია პრობლემაა მოსახლეობისთვის. ამ უბნის მცხოვრებლები ნარჩენებისგან წარმოქმნილ უსიამოვნო სუნზე წლებია საუბრობენ. ამბობენ, რომ სუნი დაკეტილ ფანჯრებშიც აღწევს, რაც ცხოვრებას აუტანელს ხდის. საკითხთან დაკავშირებით ადგილობრივებმა წლების განმავლობაში არაერთი აქცია გამართეს და ნაგავსაყრელის დახურვა არაერთხელ მოითხოვეს.
ნიკეას ნაგავსაყრელის დახურვის დაპირებიდან 12 წელია გასული, მაგრამ ახალი ნაგავსაყრელი დღემდე არ აშენებულა, მეტიც, ჯერ ადგილიც არ არის შერჩეული, სადაც ახალ პოლიგონს მოაწყობენ.
