მიხეილ სააკაშვილის საზღვარგარეთ გადაყვანის მოთხოვნით, დეპუტატების ნაწილმა შიმშილობა გამოაცხადა.
პროტესტის უკიდურეს ფორმას ამ დროისთვის სამმა დეპუტატმა – დავით კირკტიაძემ, ანი წითლიძემ და აბდულა ისმაილოვმა მიმართა.
როგორც ჟურნალისტებს დავით კირკიტაძემ განუცხადა, საკითხთან დაკავშირებით ფრაქციაში აზრთასხვადასხვაობა იყო.
დეპუტატები ამბობენ, რომ შიმშილობა იქამდე გაგრძელდება, ვიდრე მიხეილ სააკაშვილს სამკურნალოდ სხვა ქვეყანაში არ გადაიყვანენ.
დღეს, მე და ჩემმა მეგობრებმა, მიუხედავად ფრაქციაში არსებული აზრთა სხვადასხვაობისა, მივიღეთ გადაწყვეტილება, რომ მიხეილ სააკაშვილის გადაყვანამდე იმ ქვეყანაში, სადაც მისი ჯანმრთელობა იქნება უზრუნველყოფილი, ვაცხადებთ შიმშილობას. ამ პოლიტიკურ აქტთან დაკავშირებით იყო აზრთა სხვადასხვაობა ფრაქციის შიგნით, მაგრამ ჩვენ მივიღეთ ეს გადაწყვეტილება. ღრმად ვარ დარწმუნებული, რომ ეს პოლიტიკური აქტი იქნება მზარდი, იქნება პარლამენტის კედლებში და იქნება პარლამენტის კედლებს გარეთაც” – განაცხადა დავით კირკიტაძემ.
დეპუტატი ანა წითლიძე კი ამბობს, რომ “თუ ხელისუფლებას სჭირდება მსხვერპლი მირჩევნია მე ვიყო მსხვერპლი”:
ჩემი მიზანი არ არის ცუდი ემოციებისგან თქვენი დატვირთვა და მინდა ბოდიში მოვუხადო პრეზიდენტ სააკაშვილს, რომ ეს გადაწყვეტილება მასთან შეთანხმებული არაა. მე არ შემიძლია პრეზიდენტ სააკაშვილის სიკვდილს ვუყურო ციხეში და არ გავაკეთო მაქსიმუმი იმისთვის, რომ გადავარჩინო პრეზიდენტის სიცოცხლე და ჯანმრთელობა. თუ არ ხელისუფლებას სჭირდება მსხვერპლი, დაე ეს მსხვერპლი ვიყო მე. ამიტომ მე ვიწყებ შიმშილობას, მანამ სანამ პრეზიდენტ სააკაშვილს არ ექნება შესაძლებლობა რომ გადარჩეს მისი სიცოცხლე და ჯანმრთელობა.” – განაცხადა ანა წითლიძემ.
