უკრაინაში გმირულად დაღუპული, დავით რატიანის დედა ყველას მადლობას უხდის და ამბობს, რომ მას სურს იმის ნახვა, ვინც თავისმა შვილმა გადაარჩინა.
„იქ ვიღაც გადაარჩინაო… თუ გადარჩნენ, გამაცანით, დათოს მაგივრად რომ ჩავეხუტო…“, – ამბობს დავით რატიანის დედა.
დავით რატიანი რუსეთ-უკრაინის ომში დაიღუპა. ის მეორე ქართველთან ერთად საქართველოში დღეს დილით ჩამოასვენეს. გმირული პატივით ქართველ მებრძოლებს თბილისის აეროპორტში დახვდნენ. ათასობით ადამიანი საქართველოსა და უკრაინის დროშებით მივიდნენ და გმირების წინაშე მუხლი მოიდრიკეს. დავით რატიანისა და გია ბერიაშვილის ცხედრებს ანთებული სანთლებით მიაცილებდნენ. უკრაინაში გარდაცვლილი სამხედროებისთვის საქართველოსა და უკრაინის სახელმწიფო ჰიმნიც შეასრულეს.
შეგახსენებთ, უკრაინაში პუტინის სისასტიკეს 3 ქართველი მებრძოლი ემსხვერპლა. ბახვა ჩიქობავას ჩამოსვენება ამ დრომდე ვერ ხერხდება. მისი ცხედრის გამოყვანას ქართველმა თანამებრძოლებმა მარიუპოლიდან საომარი მოქმედებების გამო, ჯერჯერობით ვერ შეძლეს.
