აშშ-ში ამერიკული ფარმაცევტული კომპანია Pfizer-სა და მისი გერმანული პარტნიორის, BioNTech-ის, მიერ შექმნილი კოვიდ 19-ის საწინააღმდეგო ვაქცინის გამოყენებით მოსახლეობის მასობრივი ვაქცინაცია დღეს იწყება.
მედიის ინფორმაციით, პირველ რიგში მედიკოსები და მოხუცთა თავშესაფრების ბენეფიციარები აიცრებიან.
ვაქცინის დაჩქარებული შემუშავების პროგრამის, Operation Warp Speed-ის ხელმძღვანელის, მონსეფ სლაუის თქმით, მარტის ბოლომდე, სავარაუდოდ, 100 მილიონზე მეტი ადამიანი იქნება იმუნიზირებული. Reuters-ი წერს, რომ ეს ქვეყანაში ე.წ. კოლექტიური იმუნიტეტის“ ჩამოსაყალიბებლად საკმარისი არ იქნება და ამიტომ, გავრცელების გასაკონტროლებლად, პირბადეების ტარება და სოციალური დისტანციის დაცვა ჯერ კიდევ თვეების განმავლობაში იქნება საჭირო.
შეგახსენებთ, აშშ-ის სურსათისა და წამლების ადმინისტრაციამ Pfizer/BioNTech-ის ვაქცინის გადაუდებელი გამოყენების ნებართვა რამდენიმე დღის წინ გასცა. კომპანიებში აცხადებენ, რომ მათ მიერ შემუშავებული ვაქცინა 95 პროცენტით ეფექტურია.
