სამტრედიის №11 საჯარო სკოლა დაიხურა – 931 მოსწავლე სწავლას სხვადასხვა რეჟიმში აგრძელებს – ინფორმაციას “მთავარი ამბები” ავრცელებს.
სამტრედიის №11 საჯარო სკოლაში, სადაც ოფიციალური მონაცემებით 931 მოსწავლე ირიცხება, სასწავლო პროცესი აღარ მიმდინარეობს, თუმცა მოსწავლეები სწავლას სხვადასხვა ფორმით აგრძელებენ.
15 სექტემბრიდან I-IV კლასების მოსწავლეები №2 საჯარო სკოლაში, მეორე ცვლაში სწავლობენ, ხოლო V-XII კლასები ონლაინ რეჟიმში აგრძელებენ სწავლას.
მშობლების ინფორმაციით, ონლაინ გაკვეთილების ხანგრძლივობა თითოეულ საგანში 20 წუთია.
მშობლების ნაწილის განცხადებით, სკოლის რეაბილიტაციის შესახებ მათ მაისში შეიტყვეს და იცოდნენ, რომ ახალი სასწავლო წლიდან მათი შვილები სწავლას გრიბოედოვის ქუჩაზე მდებარე ყოფილი №15 საჯარო სკოლის, ე.წ. „სპეც. სკოლის“, შენობაში გააგრძელებდნენ.
მშობლების თქმით, აღნიშნულთან დაკავშირებით გადაწყვეტილება რამდენჯერმე შეიცვალა და საბოლოოდ, სასწავლო წლის დაწყებამდე რამდენიმე დღით ადრე გახდა ცნობილი, რომ I-IV კლასების მოსწავლეები №2 საჯარო სკოლაში, მეორე ცვლაში ისწავლიდნენ, ხოლო V-XII კლასების მოსწავლეები ონლაინ რეჟიმში გააგრძელებდნენ სწავლას.
მშობლების ინფორმაციით, მანამდე მათ ასევე უთხრეს, რომ ნოემბრიდან მოსწავლეებისთვის სწავლა №3 საჯარო სკოლაში გაგრძელდებოდა, სადაც შესაბამისი ფართი უკვე მოძიებული იყო. თუმცა, საბოლოოდ, სწავლის გაგრძელების გადაწყვეტილება კვლავ შეიცვალა.
რაც შეეხება №11 საჯარო სკოლის რეაბილიტაციას, როგორც დოკუმენტებიდან ირკვევა, ინფრასტრუქტურის სამინისტროს მუნიციპალური განვითარების ფონდმა ტენდერში გამარჯვებულ კომპანია შპს „მანე ლუქსთან“ ხელშეკრულება გააფორმა. დოკუმენტების მიხედვით, სამუშაოების შესრულების ვადად 16 თვეა განსაზღვრული.
პროექტის ფარგლებში, დოკუმენტაციის მიხედვით, დაგეგმილია სკოლის განახლება, შენობის ძირითადი ინფრასტრუქტურის მოწესრიგება, სასწავლო და ადმინისტრაციული სივრცეების რეაბილიტაცია, საინჟინრო კომუნიკაციების გაუმჯობესება და მოსწავლეებისთვის უსაფრთხო გარემოს შექმნა.
„მთავარი ამბები“ აღნიშნულ საკითხზე კომენტარისთვის სამტრედიის საგანმანათლებლო რესურსცენტრს დაუკავშირდა.
რესურსცენტრის განმარტებით, ,, სკოლა არ დახურულა.
სარეაბილიტაციო სამუშაოების გამო №11 საჯარო სკოლა სწავლების ჰიბრიდულ მოდელზე გადავიდა: 1-4 კლასები სწავლობენ ალტერნატიულ ფართში, დასწრებით, მეორე ცვლაში, ხოლო 5-12 კლასებში საგაკვეთილო პროცესი ონლაინ მიმდინარეობს”.
📰 გააგრძელე კითხვა...
