უკრაინის პრეზიდენტის ადმინისტრაციის ხელმძღვანელის მრჩეველი, ოლექსი არესტოვიჩი, ოკუპირებულ ტერიტორიებზე მცხოვრებ უკრაინელებს „სარკინიგზო ომისკენ“ მოუწოდებს.
არესტოვიჩის თქმით, ამის მიზანია რუსეთის ჯარებმა რკინიგზის გამოყენებით ვერ შეძლონ სამხედროების გადაყვანა და იარაღის გადატანა.
„მეგობრებო, ტოტალური სალიანდაგო ომი, ყველა მეთოდით ვანგრევთ მტრის გზაზე რკინიგზას, რომლითაც სამხედროები გადაჰყავთ. შემდეგ მივხედავთ, შევაკეთებთ, ძალიან ბევრ ქვეყანას სურს ჩვენი დახმარება.
მტრის სარკინიგზო მომარაგების (და ამ ტიპის მომარაგება ყველაზე ეფექტურია) შეფერხებამ შეიძლება რადიკალურად შეცვალოს სიტუაცია ჩვენს სასარგებლოდ, განსაკუთრებით ყირიმი-მელიტოპოლის მიმართულებით. ამ მიმართულებით მტერი ამარაგებს იმ დაჯგუფებას, რომელიც შტურმით შემოიჭრა მარიუპოლში.
ოღონდ საჭიროა მკაცრად გავითვალისწინოთ, რომ საკომუნიკაციო მარშრუტებს მტერი იცავს, ამიტომ ჯერ ფხიზლად შეაფასეთ თქვენი ძალა და შესაძლებლობები,“- ამბობს არესტოვიჩი.
„როცა კონფლიქტის დასაწყისში მოგიწოდებდით ტოტალური წინააღმდეგობისკენ, სამოქალაქო ომისკენ, ძალიან ბევრმა ჩრდილოეთში და ჩვენი ქვეყნის სხვა მხარეებში შესანიშნავი ომი მოაწყო მოწინააღმდეგის ზურგთან.
მან უმალვე გამოიღო შედეგი – ჩერნიგოვზე, სუმზე, ხარკოვზე, კიევზე შეტევა არ არის და ეს იმათი დამსახურებაა, ვინც მოჭრა ზურგი, იქ სპეცრაზმიც ეცადა, ადგილობრივი მოქალაქეებიც და ტერორისტული დაცვის თანამშრომლებიც, მაგრამ სწორედ ხალხის ტოტალურმა წინააღმდეგობამ გადაჭრა კიევის ხელში ჩაგდების პრობლემა, ჩერნიგოვის სავარაუდო ხელში ჩაგდების პრობლემა, სუმის… ეს უზარმაზარი სისტემატური ფაქტორია ომში.“ – ამბობს არესტოვიჩი.
აქვე ის მოუწოდებს უკრაინელებს, ლიანდაგების მოშვებასა და აყრის გარდა, მთლიანი რკინიგზის გათიშვას ენერგომომარაგებიდან:
„გააფუჭეთ ყველა ელექტროსადენი, რკინიგზის მთლიანი ენერგომომარაგება, რასაც მისწვდებით. აი, ეს იქნებოდა ზუსტად ის, რაც სჭირდება ჩვენს ჯარებს და განსაკუთრებით მათ, ვინც მარიუპოლს იცავს, ხერსონის ირგვლივ, ნიკოლაევში – ეს თითქმის ერთადერთი ადგილია, სადაც მოწინააღმდეგემ დაალაგა რკინიგზით მომარაგება“.
არესტოვიჩი მიმართავს მოქმედ და ყოფილ რკინიგზელებს, ასევე, რკინიგზასთან მცხოვრებ ადამიანებს: „დაანგრიეთ რკინიგზა ყირიმიდან ხერსონისკენ, მელიტოპოლისკენ“.
არესტოვიჩი ვიდეომიმართვაში განმარტავს, რომ ეს მხოლოდ მისი მოწოდება არ არის და გადაწყვეტილება შეთანხმებულია სხვა პასუხისმგებელ პირებთან.
