“ყველას არ შეუძლია დიდი სიყვარული დატოვოს ამ ქვეყნად, შენ კი უმაგრესი ბიჭი ხარ”
“გული მეწვის როგორი გაუხარელი წახვედი ამ ქვეყნიდან…. მაგრამ ამ ცხოვრების სულ რაღაც 17 წლის მანძილზე დაუტოვე ყველას სიყვარული და ტკბილი მოგონებები.. ჩემი კოხტა და იუმორით სავსე გოგიტა. ღმერთმა შეაძლებინოს ოჯახს ასეთი მწარე ტრაგედიის გადატანა შენ განისვენე იქ სადაც მართალნი განისვენებენ!” – წერენ გარდაცვლილი ბიჭის ახლობელები ფეისბუკზე.
ჭუბერის მუნიციპალიტეტის სოფელ ყარსგურიში სკოლის სპორტდარბაზში, ვარჯიშის დროს მე-12 კლასელმა გოგა ჩხეტიანმა თავის ტრავმა მიიღო. ამის შესახებ მესტიის მუნიციპალიტეტის სპორტული ცენტრისდირექტორმა ჯემალ კვანჭიანმა “პრაიმტაიმს“ განაცხადა.
„ჩვენ ჭუბერში გვაქვს სპორტდარბაზი,სადაც გვყავს რა თქმა უნდა ექიმი. ეს საწყალი ბიჭი კი სკოლის (ყარსგურიში) სპორტდარბაზში დადიოდა, მოყვარული სპორტსმენი იყო,რა დროსაც სავარაუდოდ, მიიღო თავის ტრავმა,მერე კი არ მიაქცია ყურადღება.თავი რომ ასტკივდა, შემდეგ გადაიყვანეს საავადმყოფოში და ასე გავიგეთ, გზაში გარდაიცვალა“, – განაცხადა მან.
შინაგან საქმეთა სამინისტროში „პრაიმტაიმს“ განუცხადეს, რომ მომხდართან დაკავშირებით აღძრულია სისხლის სამართლის საქმე 116-ე მუხლით,რაც გაუფრთხილებლობით სიცოცხლის მოსპობას გულისხმობს.
18 წლის ახალგაზრდას ხვალ სოფელში დაკრძალავენ,შემთხვევა რამდენიმე დღის წინ მოხდა.