ქუთაისში პოლიციამ დანაშაულებრივი დაჯგუფების 4 წევრი დააკავა.
ერთ-ერთი მათგანი ე.წ კრიმინალური ავტორიტეტია მეტსახელად “თეთრონი“. იგი წარსულში ცეცხლსასროლი იარაღის მართლსაწინააღმდეგო შეძენა-შენახვისთვისაა ნასამართლევი. დაკავებულია ასევე წარსულში ნარკოდანაშაულისთვის ნასამართლევი, კრიმინალური ავტორიტეტი მეტსახელად „ჩინა“და ასევე კრიმინალური ავტორიტეტი „ბუთა“. მეოთხე პირი 1983 წელსაა დაბადებული. დამატებით ინფორმაციას მასზე შსს არ ავრცელებს.
გამოძიებამ დაადგინა, რომ დაკავებული პირები ჯგუფურად, დიდი ოდენობით შემოსავლის უკანონოდ მიღების მიზნით, დაშინებით, ფიზიკური ანგარიშსწორებისა და სიცოცხლის მოსპობის მუქარით, 1994 წელს დაბადებულ მოქალაქეს უკანონოდ სძალავდნენ ონლაინ ტოტალიზატორში მოგებული ავტომანქანის – „ტოიოტა ლენდკრუიზერ პრადოს“ ღირებულების ერთ მესამედს – 10 000 აშშ დოლარს.
დანაშაული 4-დან 7 წლამდე ვადით თავისუფლების აღკვეთას ითვალისწინებს.
