ქუთაისის საერთაშორისო აეროპორტის ტერმინალის მიმდებარე ტერიტორიაზე არსებული საპარკინგე სივრცის გაფართოება იგეგმება. პროექტირებისთვის საქართველოს აეროპორტების გაერთიანებამ ტენდერი გამოაცხადა.
სატენდერო დოკუმენტებიდან ირკვევა, რომ აეროპორტის პარკინგი უნდა გაფართოვდეს ისე, რომ მინიმუმ 150 ავტომობილის მოთავსება იყოს შესაძლებელი. საპროექტო არეალი 30 000მ2-ს მოიცავს.
წინადადებების მიღება 18 ივლისს დასრულდა, ტენდერში გამარჯვებული ჯერჯერობით გამოვლენილი არ არის. ინტერესი მხოლოდ ერთმა კომპანიამ, შპს „აბსოლუტ სერვისმა“ გამოხატა, რომელმაც შესასრულებელი სამუშაოები 104 237 ლარად შეაფასა.
იმ შემთხვევაში, თუ „აბსოლუტ სერვისი“ ტენდერში გამარჯვებულად გამოვლინდება, უნდა უზრუნველყოს პარკინგის გაფართოების პროექტის მომზადება. საპროექტო სამუშაოები მოიცავს გეოლოგიური კვლევების ჩატარებას, ნახაზების შექმნას, სანიაღვრე სისტემის, საგზაო მონიშვნისა და ნიშნების დაპროექტებას, ავტოსადგომების მართვის გადახდის სისტემის პროექტირებას და ა.შ.
რაც შეეხება კომპანიას, სამეწარმეო რეესტრის მონაცემების თანახმად, შპს „აბსოლუტ სერვისი“ 2008 წელს არის რეგისტრირებული. მისი დირექტორი თედორე კუხიანიძეა. კომპანიის წილების 100%-ს კი სრულად დავით კვარაცხელია ფლობს.
