თავისთავად, ეს იმ ოკუპაციის მიმდინარე შედეგებია, რომელიც თავის დროზე „ნაციონალური მოძრაობის“ უგუნური და გარედან წაქეზებული პოლიტიკის შედეგად დადგა, – ამის შესახებ პარლამენტის თავმჯდომარემ, შალვა პაპუაშვილმა განაცხადა, რითაც უპასუხა შეკითხვას, ოკუპირებულ ცხინვალში მიმდინარე მოვლენებსა და რუსეთის ქმედებების თაობაზე.
მისი თქმით, საქართველოს ხელისუფლების ამოცანა სწორედ ის არის, რომ ოკუპაცია ანექსიაში არ გადაიზარდოს.
„თავისთავად ეს იმ ოკუპაციის მიმდინარე შედეგებია, რომელიც თავის დროზე „ნაციონალური მოძრაობის“ უგუნური და გარედან წაქეზებული პოლიტიკის შედეგად დადგა. სწორედ ეს არის საქართველოს ხელისუფლების ამოცანა, რომ ოკუპაცია არ გადაიზარდოს ანექსიაში. ამისკენ გვიბიძგებდნენ – 2022 წელს რომ რუსეთის წინააღმდეგ ესკალაციაზე გვიბიძგებდნენ ამის შედეგი რაც იქნებოდა, ყველა ხვდებოდა, ბრიუსელში ისეთი სულელი არავინ არის, რომ ვერ მიმხვდარიყვნენ, რას ნიშნავს ესკალაცია და ამას რა შედეგები შეიძლებოდა მოეტანა. ამას ავარიდეთ თავი, როდესაც ამ შენობაში, ამ საპარლამენტო დარბაზში წინა მოწვევაში რადიკალურ აგენტურულ ჯგუფებს მცდელობა ჰქონდათ, რომ პარლამენტის გამოყენებით ესკალაციაში შევეთრიეთ და დღეს ისეთი შედეგები გვქონოდა, რომლის გამოსწორებაც კიდევ უფრო მძიმე იქნებოდა. რა თქმა უნდა, მნიშვნელოვანია, რომ ეს გამოწვევა, რომელიც ოკუპაციის სახით გვაქვს, რაც შეიძლება მალე დასრულდეს და შესაბამისად ყველა სხვა გამოწვევა ოკუპაციის დასრულებასთან ერთად დასრულდება“, – განაცხადა შალვა პაპუაშვილმა.
კითხვაზე, რატომ არ არის ისეთი კრიტიკული რუსეთის ანექსიური პოლიტიკის მიმართ, როგორიც ევროკავშირის მიმართ, შალვა პაპუაშვილმა უპასუხა, რომ ისინი არათუ კრიტიკული არიან, არამედ მიაღწიეს იმას, რომ სტრასბურგმა სასამართლო დოკუმენტით დაადგინა რუსეთის ეფექტური კონტროლი ცხინვალის რეგიონზე და აფხაზეთზე.
„ჩვენ არათუ კრიტიკული ვართ, არამედ „ქართულმა ოცნებამ“ მივაღწიეთ, რომ სტრასბურგმა სასამართლო დოკუმენტით დაადგინა რუსეთის ეფექტური კონტროლი ცხინვალის რეგიონზე და აფხაზეთზე. ეფექტური კონტროლი პოლიტიკურ ენაზე რომ გადმოვთარგმნოთ, ნიშნავს ოკუპაციას. ასე, რომ „ქართულმა ოცნებამ“ და არა სააკაშვილის რეჟიმმა, რომელმაც 2008 წელს ოკუპაცია გახადა შესაძლებელი, მივაღწიეთ იმას, რომ სტრასბურგის სასამართლო დოკუმენტით დადასტურებულია, რომ რუსეთს საქართველოს ორი ტერიტორია ოკუპირებული აქვს. ამიტომ, ეს არის ჩვენი პოლიტიკა – ერთი მხრივ, სამართლებრივი და მეორე მხრივ პოლიტიკური მექანიზმების გამოყენება. ეს გულისხმობს, რომ თავიდან ავიცილოთ ის რისკები, რომელიც ანექსიას უკავშირდება“, – განაცხადა შალვა პაპუაშვილმა.
ჟურნალისტის კითხვაზე, რა შედეგი მოიტანა მათმა პოლიტიკამ და დუმილმა, და შეიძლებოდა თუ არა, რომ „რუსეთის ანექსიურ პოლიტიკას”, მაგალითად, მისი მხრიდან მოჰყოლოდა ბრიფინგი, პაპუაშვილმა უპასუხა, რომ ყველა გამოწვევას აქვს სათანადო პასუხი.
„მე ახლა ვდუმვარ, როცა ამ ყველაფერზე ვსაუბრობ?
ყველა გამოწვევას აქვს სათანადო პასუხი და სათანადო ინსტრუმენტი გამოიყენება. იქ, სადაც საჭიროა სიტყვით რეაგირება – ვიყენებთ სიტყვის რეაგირებას. იქ სადაც საჭიროა საქმით რეაგირება – არის საქმით რეაგირება; იქ, სადაც სამართლებრივი რეაგირებაა საჭირო სტრასბურგით – გამოიყენება. ყველა ეს ინსტრუმენტი სათანადო დროს, სათანადო აქტორის მიმართ გამოიყენება, სწორედ ამის შედეგია დღეს ის, თუ სად არის საქართველოს ეკონომიკურად ყველაზე მზარდი ქვეყანა, უსაფრთხოების მხრივ ყველაზე დაცული ქვეყანა და პოლიტიკურად ყველაზე მყარი ქვეყანა რეგიონში“, – განაცხადა შალვა პაპუაშვილმა.
ცნობისთვის, ოკუპირებული ცხინვალის ე.წ. პრეზიდენტი ალან გაგლოევი გადადგა და რუსეთის პრეზიდენტის, ვლადიმერ პუტინის მრჩეველი გახდა. ალან გაგლოევმა განაცხადა, რომ ვლადიმერ პუტინის შეთავაზებას დათანხმდა და ოკუპირებული ცხინვალის ე.წ. პრეზიდენტის „თანამდებობიდან“ გადადგომის შესახებ გამოაცხადა.
22 ივნისს რუსეთის პრეზიდენტის, ვლადიმირ პუტინისა და ოკუპირებული ცხინვალის გადამდგარი ე.წ. პრეზიდენტის, ალან გაგლოევის შეხვედრა გაიმართა. მათ ღრმა ინტეგრაციის შესახებ შეთანხმების რეალიზაცია განიხილეს, რომელსაც კრემლში 9 მაისს მოაწერეს ხელი.
მოგვიანებით, აღნიშნულს რუსეთის პრეზიდენტის პრესმდივნი, დიმიტრი პესკოვი გამოეხმაურა და აღნიშნა, რომ ოკუპირებულ ცხინვალში ე.წ. “მთავრობის” ცვლილება ოკუპირებული რეგიონის რუსეთში შესაძლო შესვლას არ უკავშირდება.
