თითქმის ყოველ დღე, სოციალურ ქსელში, ნიუიორკში მცხოვრები საქართველოს ყოფილი განათლების მინისტრი, კახა ალექსანდრე ლომაია ნიუიორკის ამბებს გვიყვება, რომელსაც ინტერესით ველოდებით და გვინდა მკითხველსაც გავუზიაროთ:
,,22 აპრილი, ოთხშაბათი
ქალაქში კოვიდით გარდაცვლილთა რიცხვი 15 ათასს გასცდა. კარგი ამბავი ისაა, რომ ჰოსპიტალიზებულ პაციენტთა რაოდენობა მე-9 დღეა კლებულობს.
დღეს გარდაცვლილი იდრის ბეი, გადაუდებელი სამედიცნო სამსახურის მე-8 თანამშრომელია, რომელიც ვირუსს შეეწირა. იდრისს მონაწილოება ჰქონია მიღებული 2001 წლის 11 სექტემბრის სამაშველო ოპერაციებშიც. პანდემიის დროს ის ტრენინგს უტარებდა იმ პარამედიკოსებს, ვინც პირველად დახმარებას უწევდა განსაკუთრებით მძიმე პაციენტებს.
მეტროს მემანქანე უეინ ვონგი პანდემიის განმავლობაში მხოლოდ სამი დღე არ გასულა სამსახურში. მას კოვიდით გარდაცვლილი ძმის დაკრძალვაზე უნდა ეზრუნა. სხვა დროს, არ გაჩერებულა, მუშაობდა E ხაზზე, დილიდან საღამომდე. ამ ხაზით ხშირად მიწევს მგზავრობა, როდესაც სამსახურიდან სახლში ვბრუნდები.
ექთანი ჯენა გრეკო ყვება, რომ პანდემიის და პაციენტთა უზარმაზარი ნაკადების მოზღვავების პირობებში, ყველაზე რთული მისთვის იყო ის, რომ რობოტად არ გადაქცეულიყო, და არ დაეკარგა იმის განცდა, რომ ყოველი მძიმე პაციენტი განუმეორებელი ადამიანი იყო, თავისი ცხოვრებით, სიხარულით, ტკივილით, მოგონებებით და მისწრაფებებით, და არა უბრალოდ სტატისტიკა და მორიგი პაციენტი. “როცა ასეთ პაციენტს FaceTime-ით დააკავშირებ მის ოჯახთან, და იცი, რომ, შესაძლოა, ეს მათი უკანასკნელი საუბარი იყოს, ძნელია თავი შეიკავო”, ამბობს ჯენა.
სწორედ იდრისი, უეინი და ჯენა, მათ კოლეგებთან ერთად, მათ შორის, ჩვენს ნანა გეგეჭკორთან ერთად, შევლენ ამ ქალაქის ისტორიაში, როგორც პანდემიასთან ბრძოლის გმირები, პროფესიონალიზმის, გამბედაობისა და ადამიანურობის სახეები.
მერმა დამოუკიდებლობის დღის აღლუმი და ფოიერვერკი, როგორც ყოველთვის, 4 ივლისს უნდა გავმართოთო. დამოუკიდებლობის დღე აქაურების უსაყვარლესი დღესასწაულია.
ამერიკაში შინაური ცხოველების კოვიდით დაავადებით პირველი შემთხვევა ჩვენ შტატში მოხდა. ორი ნიუ-იორკელი ფისო თავს კარგად გრძნობსო. აქ ამბობენ, კატებს ცხრა სიცოცხლე აქვთო. ამათ ცხრავე დასჭირდებათ.
სენატის ორპარტიულმა კომისიამ გამოაქვეყნა თავისი სამწლიანი მუშაობის დასკვნა, რომელშიც დაადასტურა, რომ: 1) რუსეთი ჩაერია 2016 წლის საპრეზიდენტო არჩევნებში და 2) რუსეთის ჩარევის მიზანი ტრამპის დახმარება იყო.
ჩვენი ქუჩის ტროტუარზე მოძუნძულეებს დღეს ერთი სასაცილო წყვილი შეემეტა. ენერგიულად მოძუნძულე დედას უკან უხალისოდ მიყვებოდა 8-9 წლის პუტკუნა ბიჭუნა. დედამ რამდენჯერმე სცადა შვილის გამხნევება და ძუნძულში აყოლიება, მაგრამ უშედეგოდ. იმას აშკარად ტახტზე წამოგორება, ჩიფსების ჩახრამუნება და ვიდეოთამაშების თამაში ერჩივნა. ასე ძიძგილაობაში მიეფარნენ თვალს.
მთელი დღე მზიანი და თბილი ამინდი იყო.
Nana Gegechkori ” წერს ყოფილი მინისტრი.
