ქუთაისისთვის უმწვავესი პრობლემაა კანალიზაცია. ქალაქის 40% სწორედ აღნიშნული საკითხი აწუხებს. 21-ე საუკუნუში ქალაქის ცენტრალურ უბნებში კანალიზაციის ღია მილები არხებზეა მიშვებული. ქუჩებში, სადაც ტურისტები გადაადგილდებიან გაუსაძლისი სუნი დგას, ფეკალური მასების ნაწილი კი ქალაქის მთავარ მდინარეში, რიონში ჩაედინება. ეს პრობლემა ქალაქს საბჭოთა კავშირიდან მოყოლებული აწუხებს, თუმცა დღემდე მისი მოგვარება მხოლოდ სიტყვიერ დაპირებად რჩება.
პრობლემის გადაჭრას ქუთაისელებს გაერთიანებული წყალმომარაგების კომპანია ჰპირდება და ამბობენ რომ ამ კუთხით ნაბიჯები უკვე გადადგულია. მრავალმილიონიანი პროექტის, რომელსაც ევროპის საინვესტიციო ბანკი აფინანსებს, და დაგეგმილი სამუშაოების შესახებ ტელეკოპანია “მეგა ტვ”-ს საქართველოს გაერთიანებული წყალმომარაგების კომპანიის ქუთაისის რეგიონალური ფილიალის ხელმძღვანელი ბექა ბარბაქაძე ესაუბრა:
“კანალიზაციის პრობლემა ისტორიულად დგას ქალაქის წინაშე და აქედან გამომდინარე ჩვენმა მთავრობამ და რეგიოუნული განვითარებისა და ინფრასტრუქტურის სამინისტრომ მოიძია 100 მილიონი ევროს ოდენობის პროექტი, რომელიც უზრუნველყოფს კანალიზაციის ქსელის, როგორც მოწყობას, ისე გამწმენდი ნაგებობის მშენებლობას. დღეისათვის დაწყებულია აღნიშნულ პროექტთან დაკავშირებული კვლევები და ქალაქის სრულად შესწავლა, მაგისტრალების დაგეგმვა, ტერიტორიების მოძებნა, თუ სად უნდა მოხდეს გამწმენდი ნაგებობის მშენებლობა და საკმაოდ დაჩქარებული ეტაპი არის ამ კუთხითაც დაწყებული. ველოდებით პროექტის შექმნას, შემდეგ გამოცხადდება ტენდერი საპროექტო სამუშაოებზე და ამის შემდგობ გამოცხადდება ტენდერი უკვე სამშენებლო სამუშაოებზე. ჩვენ ჩართულები ვართ პროექტის შემუშავებაში, ხდება ქუჩების შესწვალა და პრობლემების მიწოდება, რათა ქალაქი იყო სრულად აღჭურვილი ამ კუთხით.
აღნიშნული სამუშაოები დაიწყება იმ შემთხვევაში თუ შემუშავდება ქალაქთან დაკავშირებით სრული ინფორმაცია და დაიდება პროექტი, რომელიც დაინტერესებულ კომპანიებს მიაწვის სრულ ინფორმაციას ქალაქში არსებული პრობლემების შესახებ. საკმაოდ მასშტაბური სამუშაო, მაგრამ მე იმედიანად ვარ განწყობილი, რადგან დაწყებულია ეს სამუშაოები და მოიცავს თავის ეტაპებს.” – განაცხადა საქართველოს გაერთიანებული წყალმომარაგების კომპანიის ქუთაისის რეგიონალური ფილიალის ხელმძღვანელმა ბექა ბარბაქაძემ “მეგა ტვ”-თან საუბრისას.
როგორც ბექა ბარბაქაძემ ჩვენთან საუბრისას აღნიშნა ის კანალიზაციის სისტემის მოწესრიგების კონკრეტულ ვადებს ვერ ასახელებს, რადგან პროექტი საერთაშორისოა. მიმდინარე წლის ნოებერში ამავე საკითზე “მეგა ტვ”-თან ისაუბრა ქუთაისის გაერთიანებული წყალმომარაგების კომპანიის საერთაშორისო შესყიდვების დეპარტამენტის უფროსმა გიორგი მათიაშვილმა და განაცხადა რომ, სამუშაოები 2020 წელს დაიწყება და გეგმის შესაბამისად 4 წლის განმავლობაში გაგრძელდება.
4 წელი არც თუ ისე ცოტა დროა, ქალაქის მოსახლეობას კი კვლავ ის დარჩენია რომ დანაპირების პირნათლად შესრულებას დაელოდოს.
“2-3 თვეში ქალაქი სრულად გადავა 24 საათიან წყალმომარაგებაზე”