ვლადიმერ პუტინთან დაპირისპირებული რუსი ოპოზიციონერი, ალექსეი ნავალნი 17 იანვარს რუსეთში დაბრუნდა. პოლიტიკოსი სამართალდამცველებმა შერემეტიევოს აეროპორტში საპასპორტო კონტროლის გავლის დროს დააკავეს. მოგვიანებით კი სასამართლომ 3,5 წლით პატიმრობა მიუსაჯა.
დევნილი რუსი პოლიტიკოსის ისტორიამ ბევრს საქართველოს მესამე პრეზიდენტი, მიხეილ სააკაშვილი გაახსენა, რომელიც ამ დროისთვის უკრაინის მოქალაქეა და რომელსაც საქართველოში დაბრუნების შემთხვევაში პატიმრობა ემუქრება.
ჟურნალისტი მერაბ მეტრეველი აცხადებს, რომ ნავალნიმ გაბედა ის, რაც სააკაშვილმა ვერ გააკეთა.
“არ ვიცი, ნავალნი პუტინს როდის დამარხავს (იმედია, ეს მალე მოხდება), მაგრამ მიხეილ სააკაშვილი რომ უკვე დამარხა, ფაქტია.
მან გაბედა და გააკეთა ის პუტინის რუსეთში, რაც მიშამ ივანიშვილის საქართველოში ვერ გააკეთა.”, – წერს მერაბ მეტრეველი სოციალურ ქსელში.
განსხვავებული პოზიცია აქვს “მთავარი არხის” გენერალურ დირექტორს, ნიკა გვარამიას. მისი თქმით, ნავალნი საკუთარ ქვეყანაში დაბრუნდა და ეს არაფერია იმასთან შედარებით რაც სააკაშვილმა გააკეთა, როცა უკრაინაში, სხვა ქვეყანაში დაპატიმრების საფრთხის მიუხედავად დაბრუნდა.
“ნავალნიზე მე მაღალი წარმოდგენის არ ვარ. ნავალნი არის გამოძერწილი ფიგურა. ახლა თუ ვილაპარაკებთ ქვეყანაში შესვლაზე, ძაან დიდი ბოდიში, მაგრამ მიხეილ სააკაშვილი შევიდა უკრაინაში ფეხით, საერთოდ სხვა ქვეყანაში, თავის ქვეყანაში კი არა. ნავალნი ახლა ყველა ევროპული ქვეყნის ელჩმა და ამერიკის ელჩმა რომ ჩასვა თვითმფრინავში, საგზალი ჩაუდო, კარგად დააპურა და ჩააცილა ლამის მოსკოვამდე, მე არ ვარ მასზე დიდი წარმოდგენის, მართალი გითხრათ.
მთავარი რატომაც არ ვარ არის ის, რასაც [ნავალნი] საქართველოზე და ოკუპირებულ ტერიტორიებზე ლაპარაკობს, ამას მე ჯერჯერობით მას ვერ ვაპატიებ, თუ სხვა რამეს არ იტყვის რათქმაუნდა. პუტინის და ნავალნის მიმართებები ოკუპაციასთან დაკავშირებით დიდად განსხვავებული არ არის. რათქმაუნდა, პუტინზე უარესი არაფერი არ არის, მაგრამ მე მაინტერესებს ჩემს ქვეყანასთან რა დამოკიდებულება აქვს კონკრეტულ ადამიანს, თავის ქვეყანაში რას აპირებს მეორეხარისხოვანია. ნავალნი იქნება ცარი, ოდესმე თუ მოვიდა ხელისუფლებაში, ოღონდ უკეთესი ვიდრე პუტინი”, – განაცხადა ნიკა გვარამიამ
