პარლამენტთან აქციის დაშლისას რამდენიმე ადამიანი დაშავდა. ჩიტაძის ქუჩაზე, ერთ-ერთი დაშავებული აქციის მონაწილეებმა თავად გაიყვანეს და სასწრაფო დახმარების მანქანასთან მიიყვანეს, სადაც მას პირველადი დახმარება უტარდება.
პარლამენტთან აქციის ასევე რამდენიმე მონაწილე დააკავეს. დაძაბული სიტუაციაა პარლამენტის გვერდით, ჩიტაძის ქუჩაზე. ადგილზე ამ დრომდე რჩებიან პოლიტიკური ლიდერები, მათ შორის, გიგა ბოკერია, გიგი უგულავა, გიორგი კანდელაკი, ნიკა მელია. ასევე ადგილზე იმყოფებიან მალხაზ მაჩალიკაშვილი და თორნიკე მამალაძე.
პარლამენტის სამივე შესასვლელთან სპეცრაზმია მობილიზებული. სპეცდანიშნულების რაზმი პარლამენტის შენობის მიმდებარე ტერიტორიის აქციის მონაწილეებისგან გათავისუფლებას ცდილობს. სპეცრაზმი იმყოფება როგორც ჩიტაძის ქუჩაზე, ასევე ზუბალაშვილების ქუჩასა და რუსთაველის გამზირზე. ასევე, სპეციაზმის კიდევ ერთი ჯგუფი დაძრულია ოპერის მიმდებარე ტერიტორიიდან.
სპეცდანიშნულების რაზმი ცდილობს ტერიტორიიდან აქციის მონაწილეთა გაყვანას. ინტენსიურად ხდება წყლის ჭავლის გამოყენება.
