თბილისის მერი, კახი კალაძე სამსახურეობრივი უფლებამოსილების გადამეტების გამო ჩუღურეთის გამგებლის მოადგილის დაკავებას ეხმაურება და აღნიშნა, რომ ეს ფაქტი ძალიან ცუდია და “არავის არასდროს არავის არ გაუტარებენ ამ მიდგომას”.
“ძალიან ცუდი ფაქტია და მინდა ამ ფაქტს გამოვეხმაურო. ჩვენ ძალიან ბევრჯერ ვისაუბრეთ, წინა წელსაც და თქვენ ყველას დაგევალათ განსაკუთრებული სიფრთხილე კორუფციასთან დაკავშირებით. თქვენ იცით ჩემი დამოკიდებულება და მიდგომა გადაცდომებთან დაკავშირებით. ამიტომ, კიდევ ერთხელ მინდა ყველას მოგიწოდოთ, მაქსიმალური სიფრთხილით გავაკონტროლოთ თითოეული ჩვენი თანამშრომელი. გავამახვილოთ მაქსიმალური ყურადღება, რომ ვინმეს არ ჰქონდეს გადაცდომა.
რაც შეეხება იმ კონკრეტულ ფატს, რომელიც ეხება ჩუღურეთის რაიონის გამგებლის მოადგილეს, მე აქ უდანაშაულობის პრეზუმფციას ვერ დავარღვევ, დაველოდოთ გამოძიებას და გამოძიება გვეტყვის, რასთან გვაქვს საქმე. თუმცა, კიდევ ერთხელ მინდა, ყველა გავაფრთხილო, მაქსიმალური ყურადღება სამსახურებში, ჩვენს თანამშრომლებთან, იმიტომ, რომ კატეგორიულად მიუღებელია რაიმე სხვა მიმართულებით ფიქრი, გადაცდომა, კორუფციაში ჩართულობა და ა.შ. ვთქვიდა კიდევ ერთხელ გავიმეორებ, რომ არასდროს არავის არ გავუტარებთ ამ მიდგომას და დამოკიდებულებას. ყველას მაქსიმალურად კანონის სიმკაცრით მოვთხოვთ პასუხს”, – თქვა კახი კალაძემ.
შეგახსენებთ, რომ ჩუღურეთის რაიონის გამგებლის მოადგილეს აღკვეთის ღონისძიების სახით პატიმრობა შეეფარდა. სუს-ის ანტიკორუფციულმა სააგენტომ ვალდიმერ გოგსაძე სამსახურეობრივი უფლებსამოსილების გადამეტების ბრალდებით, სამუშაო კაბინეტში 25 იანვარს დააკავა.
გამოძიება საქართველოს სისხლის სამართლის კოდექსის 333-ე მუხლის პირველი ნაწილით მიმდინარეობს.
