თბილისში გამართულ აქციაზე ქუთაისელი ზაზა ლიპარტია დაშავდა.
მამაკაცი, რომლსაც, დარბევისას დაშავდა და წყლის ჭავლმა თვალი დაუზიანდა, დღეს დილით კვლავ აქციაზე მივიდა. ლიპარტიას თქმით, მან სამედიცინო ჩარევაზე უარი განაცხადა და ამის შემდეგ, კლინიკა დატოვა. როგორც ცნობილია მხედველობის დაკარგვის საფრთხე არ არსებობს, თუმცა მას ოპერაცია მაინც სჭირდება. „ერთიანი ნაციონალური მოძრაობის“ წევრი გუშინ, აქციაზე დასასწრებლად ქუთაისიდან გაემგზავრა.
ზაზა ლიპარტია, რომელიც საქართველოს პირველი პრეზიდენტის ზვიად გამსახურდიას დაცვაში მუშაობდა, ამბობს, რომ ბევრი რამ უნახავს და გადაუტანია, მაგრამ ხელისუფლებისგან არ ელოდებოდა დილის 5 საათზე აქციის დარბევას:
“ხელისუფლების მიდგომა ასეთია: თუ კრიტიკული მასა არ გამოვა, შეგიძლია გალახო, თუ კრიტიკული მასა გამოვა, ანგარიში უნდა გაუწიო, რაც არასწორი მიდგომაა”, – აცხადებს ლიპარტია.
შეგახსენებთ, დილის 05:00-ზე რობოკოპებისა და წყლის ჭავლის გამოყენებით შსს-მ პარლამენტთან მიმდინარე აქცია დაარბია. რამდენიმე ადამიანი დაშავდა, დაშავებულია “მთავარი არხის” ჟურნალისტი ვასილ დაბრუნდაშვილიც, რომელსაც წყლის ჭავლმა ხელი მოტეხა. შშ-ს განცხადებით, პროტესტი გასცდა გამოხატვის თავისუფლების ჩარჩოებს და დაირღვა კანონი მანიფესტაციებისა და შეკრებების შესახებ, რის გამოც საპოლიციო ძალებმა რუსთაველის გამზირზე მიმდინარე აქცია დაშალეს და პარლამენტის შესასვლელების ბლოკირება აღკვეთეს. დაკავებულია 28 ადამიანი, მათ პოლიციისადმი დაუმორჩილებლობა და წვრილმანი ხულიგნობა ედებათ ბრალად. ბოლო ცნობით დაკავებულების ნაწილი ხელწერის საფუძველზე გაათავისუფლეს.
შეგახსენებთ, პარლამენტის შესასვლელებთან მყოფი აქციის მონაწილეები სპეციალური დანიშნულების რაზმმა რამდენიმე საათის წინ დაშალა. აქცია კვლავ გრძელდება – რუსთაველის გამზირზე ცეცხლის დასანთებად წიგნები მიიტანეს.
