ვაკის პარკის მებაღემ დევი მეზურნიშვილმა განაცხადა, რომ ვაკის პარკში სანამ ორი ბავშვი შადრევნიდან ამოიყვანა, მესამე ბავშვთან მისვლა ძალიან გართულდა.
მისივე თქმით, შადრევნიდან ბავშვების ამოყვანის შემდეგ არცერთი მათგანი კონტაქტური არ იყო.
„უამრავი ხალხი იყო, როცა ხმაური გავიგე რომ შველას ითხოვდნენ გავიქეცი და დამხვდა სამი ბავშვი. დაუყოვნებლივ ჩავედი და ამოვიყვანე სამივე. სანამ ორი ბავშვი გამოვიყვანე, მესამესთან მისვლა ძალიან გართულდა. შადრევანი მალე გამორთეს, მაგრამ მისი სიცოცხლე ვერ გადავარჩინეთ.
შადრევანი დროულად გამორთეს, მაგრამ ვერ შევძელით გადარჩენა. პირველი დახმარება რაც შეგვეძლო აღმოვუჩინეთ. უამრავი ხალხი იყო და ყველა ცდილობდა მის გადარჩენას. იმ დროს არცერთი ბავშვი არ იყო კონტაქტური“, – აღნიშნა მეზურნიშვილმა.
ცნობისთვის, 13 ოქტომბერს ვაკის პარკში უბედური შემთხვევა მოხდა. მოზარდებს, რომლებიც პარკში თამაშობდნენ, ბურთი შადრევანში ჩაუვარდათ. შადრევანში ბურთის ამოსაღებად ჩასულ მოზარდებს დენმა დაარტყა.
დაშავებული მოზარდები შადრევნიდან მეეზოვემ გამოიყვანა. სამივე მათგანი სასწრაფო სამედიცინო ჯგუფმა კლინიკაში გადაიყვანა. ერთ-ერთი, 13 წლის გოგო კლინიკაში მიყვანის შემდეგ გარდაიცვალა.
ორი მოზარდიდან ერთ-ერთის ჯანმრთელობის მდგომარეობა სტაბილურია, ხოლო მეორე მოზარდი ექიმების დაკვირვების ქვეშ, ფილტვის ხელოვნურ ვენტილაციაზე იმყოფება.
