მკვლევარები აცხადებენ, რომ დაადგინეს საიდან გავრცელდა შავი ჭირი, რომელსაც 600 წლის წინ ევროპაში, აზიასა და აფრიკაში ათობით მილიონი ადამიანი ემსხვერპლა. ამის შესახებ BBC წერს.
გამოცემის ინფორმაციით, მე-14 საუკუნეში მძვინვარე პანდემია ერთ-ერთი ყველაზე სერიოზული ეპიზოდი იყო კაცობრიობის დაავადებების ისტორიაში, თუმცა მრავალწლიანი კვლევების მიუხედავად, მეცნიერები ვერ ადგენდნენ, სად წარმოიშვა და საიდან გავრცელდა შავი ჭირი.
ახალმა კვლევამ, რომელიც შოტლანდიის სტერლინგის უნივერსიტეტისა, გერმანიის მაქს პლანკის ინსტიტუტისა და ტუბინგენის უნივერსიტეტის თანამშრომლებმა ჩაატარეს, ამ კითხვას პასუხი გასცა. მონაცემების მიხედვით, შავი ჭირი ცენტრალურ აზიაში, კერძოდ კი ყირგიზეთის ტერიტორიაზე, 1330-იან წლებში წარმოიშვა.სპეციალისტებმა ყირგიზეთში, ტბა ისიკ-კულთან სამარხებში დაკრძალული ადამიანების კბილებსა და ჩონჩხებში არსებული დნმ-ი შეისწავლეს. ეს ადგილი იმიტომ აირჩიეს, რომ 1338-1339 წლებში აქ დაკრძალულთა რაოდენობა მკვეთრად გაიზარდა.
მეცნიერებმა შავი ჭირის გამომწვევი ბაქტერია Yersinia pestis-ი სამ ნიმუშში აღმოაჩინეს და ვარაუდობენ, რომ დაავადება სწორედ აქედან გავრცელდა. თუმცა სხვა სპეციალისტები აღნიშნავენ, რომ საბოლოო დასკვნების გამოსატანად მონაცემები სხვა რეგიონებიდანაც არის საჭირო.
მეცნიერთა კვლევა სათაურით „მე-14 საუკუნეში ცენტრალურ ევრაზიაში გავრცელებული შავი ჭირის წყარო“ ჟურნალში Nature გამოქვეყნდა.
