5 მაისს ასპინძის ცენტრში, თანასოფლელის მიერ დანით მოკლული 36 წლის ი.მ. სავარაუდოდ შინაგან საქმეთა სამინისტროს სამცხე–ჯავახეთის განსაკუთრებულ დავალებათა სამხარეო სამმართველოს თანამშრომელია, აღნიშნულის შესახებ სოფელ ტოლოშში მცხოვრებლები საუბრობენ. უწყებაში კი ინფორმაციას არც გვიდასტურებენ და არც უარყოფენ.
“ორივე ტოლოშელია. ჩემი კარის მეზობელია დაღუპული. მანამდე დაპირისპირება არ ჰქონიათ. გარდაცვლილი სპეცრაზმში მუშაობდა”, – ამბობს სოფელში მერის წარმომადგენელი დათო მელიქიძე.
იგივეს ამბობენ მეზობლებიც. მათი თქმით, გარდაცვლილი და ბრალდებული ერთმანეთის ნათესავები არიან, “ბრალდებული მოკლულის შვილის ნათლიაა. მეგობრობდნენ, სხვა ჩვენ არაფერი ვიცით”, – ამბობს ტოლოშში მცხოვრები ნანული ივანიძე.
ბრალდებულის დედის ინფორმაციით, მის შვილსა და გარდაცვლილს მკვლელობის დღემდე ცუდი ურთიერთობა არ ჰქონიათ. 5 მაისის საღამოს დაპირისპირება გარდაცვლილის ტელეფონზე მისულ მოკლეტექსტურ შეტყობინებას მოჰყვა, “ამბობენ პირადი კონფლიქტიაო. ჩემთან არავინ არ მოსულა, როგორც მითხრეს თავისი ნებით ჩაბარდა პოლიციას. მკვლელობის დროს მანქანაში მისი ბიძაშვილიც იყო, იმას უთქვამს, ეს რა ჰქენიო და უპასუხია ღირსია, უნდა მოკვდესო”, – ამბობს დაკავებული ა.ნ–ს დედა.
შეგახსენებთ, რომ გუშინ, 5 მაისს დაბა ასპინძის ცენტრში, სოფელ ტოლოშში მცხოვრებმა, წარსულში ნასამართლევმა ა.ნ–მ თანასოფელი 36 წლის კაცი დანით მოკლა. გარდაცვლილს ყელში ორი ღრმა ჭრილობა აქვს მიყენებული. იგი საავადმყოფოში გამვლელის მანქანით მიიყვანეს, თუმცა უკვე გარდაცვლილი იყო.
ბრალდებული უკვე დაკავებულია, პოლიციამ დანაშაულის ჩადენის იარაღი – დანა ნივთმტკიცების სახით ამოიღო.
განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს. უწყების ინფორმაციით, დანაშაული 7-დან 15 წლამდე ვადით თავისუფლების აღკვეთას ითვალისწინებს.
წყარო:sknews.ge
