უკრაინაში რუსი ოკუპანტების მიერ გაუპატიურების ასობით შემთხვევა დაფიქსირდა, მათ შორის არასრულწლოვანი გოგონები, ბავშვები და ჩვილიც კი, – ამის შესახებ უკრაინის პრეზიდენტმა, ვოლოდიმირ ზელენსკიმ ლატვიის პარლამენტისადმი მიმართვისას განაცხადა.
როგორც მან აღნიშნა, უკრაინის შეიარაღებული ძალების მიერ გათავისუფლებულ რეგიონებში რუსეთის ჩადენილი სამხედრო დანაშაულების აღრიცხვასა და გამოძიებასთან დაკავშირებით მუშაობა გრძელდება.
„თითქმის ყოველდღიურად ცნობილი ხდება დაღუპულთა ახალი მასობრივი სამარხების შესახებ. ათასობით მსხვერპლი, ასობით სასტიკი წამების შემთხვევა, ადამიანების გვამები ნაპოვნია კანალიზაციის ჭებსა და სარდაფებში.
ჯერ კიდევ არ ვიცით მსხვერპლის ზუსტი რაოდენობა. გაუპატიურების ასობით შემთხვევა დაფიქსირდა, მათ შორის არასრულწლოვანი გოგონები, ძალიან მცირეწლოვანი ბავშვები და ჩვილი – ახლა ამაზე ლაპარაკი უბრალოდ საშინელებაა, მაგრამ ეს მოხდა“, – თქვა ზელენსკიმ.
მან აღნიშნა, რომ იდენტიფიცირებულია ბავშვის მიმართ დანაშაულის ჩამდენიც – რუსი ჯარისკაცი ქალაქ ფსკოვიდან, რომლის გვარიც არის ბიჩკოვი. ზელენსკის თქმით, მან თანამებრძოლებს ვიდეო გაუგზავნა, რომელშიც აღბეჭდილია „თუ რას უკეთებს ის ბავშვს და როგორ ტანჯავს მას”.
„აჰა. ასეთია რუსი ჯარისკაცი, „ბავშვების დამცველი“. ასეთია „სპეცოპერაცია“, რომელიც მოსკოვში დაგეგმეს.
ამიერიდან სწორედ ამასთან იქნება ასოცირებული რუსეთის ჯარი და ფსკოველი დესანტები – ჩვილის გაუპატიურება“, – აღნიშნა უკრაინის პრეზიდენტმა.
“მაინტერესებს, რუსეთის თავდაცვის მინისტრი და ამ “სპეცოპერაციის” სხვა ავტორები ასეთ შედეგებს ახლა როგორ შეაფასებენ?
ასეთი დანაშაულების შემდეგ, რუსი ჯარისკაცის ბიჩკოვის თუნდაც ასეთი „გმირობის“ შემდეგ, იქნებ, თავდაცვის მინისტრმა მოიწვიოს ასეთი ფსკოველი ჯარისკაცები, რათა მათ მის სახლში დაიცვან მისი შვილები და შვილიშვილები.
ხომ არ სურს ეს პატივცემულ მინისტრს? მგონია, რომ არა – დარწმუნებული ვარ, რომ მას შეეშინდება”, – დასძინა სახელმწიფოს მეთაურმა.
