ზესტაფონის ქარის ელექტროსადგურის მშენებლობა 2020 წელს უნდა დაიწყოს – ინფორმაციას საქართველოს ენერგეტიკის განვითარების ფონდის ვებ-გვერდზე ვკითხულობთ.
როგორც ცნობილია ზესტაფონში ქარის ელექტროსადგურის პროექტს „ენერგეტიკის განვითარების ფონდი“ და შპს „ჯეოკრაფტი“ განახორციელებენ.
ზესტაფონის ქარის ელექტროსადგურის პროექტის განხორციელების მიზნით, ინვესტორის შერჩევა ფონდის მიერ 2017 წლის 18 იანვარს გამოცხადდა. გამარჯვებულ კომპანიად კი შპს „ჯეოკრაფტი“ გამოვლინდა.
საქართველოს ენერგეტიკის განვითრების ფონდის მიერ გამოცხადდა ტენდერი ინვესტორის შერჩევაზე იმერეთის რეგიონში, ზესტაფონის მუნიციპალიტეტეტის ტერიტორიაზე, 150 მეგავატამდე სიმძლავრის ქარის ელექტროსადგურის პროექტის განვითარებაზე. აღნიშნულ ტენდერში მონაწილეობა მიიღო სამმა კომპანიამ: შპს „ჩაინა ნუქლეარ ინდასტრუ 23 კონსტრაქშენ“, შპს „ჯეოკრაფტი“ და სს „კავკასიის ქარის კომპანიამ“. წარმოდგენილი წინადადებების საფუძველზე გამარჯვებულ კომპანიად გამოცხადდა შპს „ჯეოკრაფტი“,, რომელიც არის გერმანიაში არსებული ენერგო კომპანია „ენერკრაფტის“ პარტნიორი საქართველოში.
პარტნიორებს შორის წილობრივი გადანაწილება ასეთია: სს „საქართველოს ენერგეტიკის განვითარების ფონდი“ – 10%; შპს „ჯეოკრაფტი“ – 90%.
ამჟამად მიმდინარეობს მეტეოროლოგიური ანძის დამონტაჟების მიზნით საჭირო პროცედურების გავლა, პარალელურად კი კომპანიამ მიმართა საქართველოს ეკონომიკისა და მდგრადი განვითარების სამინისტროს მემორანდუმის ვადის გახანგრძლივებაზე, უკანასკნელი გამოწვეულია განახლებადი ენერგიების ქსელთან ინტეგრაციის კვლევის შედეგებიდან გამომდინარე.
პროექტის სამშენებლო სამუშაოების დაწყების საორიენტაციო პერიოდია 2020 წლის გაზაფხული-ზაფხული.
სავარაუდო გამომუშავება: 162 მლნ.კვტ.საათი;
სავარაუდო ინვესტიცია: 60,000,000 აშშ დოლარი;
