იაშვილის სახ. ბავშვთა ცენტრალური საავადმყოფოს სამედიცინო დირექტორის ივანე ჩხაიძის განცხადებით, ე.ი. ბუსტერ დოზის გაკეთების შემდეგ მომდევნო დოზის გაკეთების სავარაუდო თარიღი 2022 წლის ოქტომბერი იქნება.
როგორც „საქმიან დილასთან“ ჩხაიძემ განმარტა, ვირუსი 2022 წლის ბოლოსკენ სეზონური ვირუსის სახეს მიიღებს და მისი მართვა გრიპის ვაქცინის მსგავსად იქნება შესაძლებელი.
„ასეთი შიშები არის, რომ ეტაპობრივად მოგვიწევს ვაქცინის გაკეთება, „ვაქცინადამოკიდებული გავხდებითო“ ზოგიერთი ასეთ ტერმინსაც იყენებს.
თუ შევხედავთ იმ მონაცემებს, რაც დღეისათვის გვაქვს, მიჩნეულია რომ ვაქცინის ორი დოზის გაკეთების შემდეგ საშუალოდ 6 თვის განმავლობაში ეს ვაქცინები აქტიურად გვიცავენ ნებისმიერი შტამისგან.
რაც შეეხება ბუსტერის გაკეთების შემდეგ პერიოდს, შეიძლება 2022 წელს დაგვჭირდეს იმ შემთხვევაში თუ ის სეზონური ვირუსის სახეს მიიღებს და ასეც მოხდება.
ისე როგორც გრიპის შემთხვევაში წელიწადში ერთხელ გვიწევს აცრის გაკეთება, ასევე იქნება კოვიდის შემთხვევაშიც, არა 6 თვეში ერთხელ, არამედ წელიწადში ერთხელ.
ასე რომ ახლა მარტში მოუწევს უმრავლესობას ბუსტერის გაკეთება, ასეთი თანმიმდევრობის გათვალისწინებით ის ხალხი, ვინც დღეიდან მარტამდე გაიკეთებს ბუსტერს, შესაძლებელია მათთვის ახალი ვაქცინის გაკეთების საჭიროება დადგეს 2022 წლის ოქტომბერში.
ეს არის ის პერიოდი, როცა წელიწადში ერთხელ გრიპის ვაქცინას ვაკეთებთ, რაც საკმარისი იქნება რომ ორგანიზმი დაიცვას მთელი წლის განმავლობაში”, – განმარტა ჩხაიძემ.
