გაერო-ს კვირეულის ფარგლებში ხვალ, ქუთაისში, გარემოსდაცვითი ღონისძიება გაიმართება. ღონისძიება ორგანიზაციების, „საქართველოს ალიანსი უსაფრთხო გზებისთვისა“ და განათლების განვითარების და დასაქმების ცენტრის მიერ, გაერო-ს მხარდაჭერითაა ორგანიზებული.
„საქართველოს ალიანსი უსაფრთხო გზებისთვის“ ინფორმაციით, ქუთაისის ბოტანიკურ ბაღში გაერო-ს მუდმივი კოორდინატორი საქართველოში საბინე მახლი, იმერეთში სახელმწიფო რწმუნებულის პირველი მოადგილე იოსებ ხახალეიშვილი და მერის მოადგილე ნინო თვალთვაძე, ახალგაზრდა ლიდერებთან ერთად, ხეების დარგვის პროცესში მიიღებენ მონაწილეობას.
ღონისძიების ოფიციალურ გახსნაზე მისასალმებელი სიტყვებით წარდგებიან – გაეროს მუდმივი კოორდინატორი საქართველოში საბინე მახლი, იმერეთში სახელმწიფო რწმუნებულის პირველი მოადგილე იოსებ ხახალეიშვილი, ქუთაისის მერის მოადგილე ნინო თვალთვაძე, საქართველოს ალიანსი უსაფრთხო გზებისთვის გამგეობის თავმჯდომარე ეკა ლალიაშვილი, განათლების განვითარების და დასაქმების ცენტრის გამგეობის თავმჯდომარე ლიკა კილაძე და გაეროში საქართველოს ახალგაზრდობის წარმომადგენლი ესმა გუმბერიძე.
ღონისძიების ბოლოს გაეროს მუდმივი კოორდინატორი საქართველოში კვირეულის ფარგლებში, გაეროს მდგრადი განვითარების მიზნების თემაზე, ორგანიზებული ნახატების კონკურსისა და ვიქტორინის გამარჯვებულებს სერტიფიკატებსა და სამახსოვრო საჩუქრებს გადასცემს.
მდგრადი განვითარების მიზნების და ახალგაზრდობის თემას მიეძღვნება ესმა გუმბერიძის, გაეროში საქართველოს ახალგაზრდობის წარმომადგენლის საჯარო ლექცია, რომელიც ბოტანიკური ბაღის ამფითეატრში, 14:00 საათზე დაიწყება.
21-24 ოქტომბერი საქართველოში გაეროს კვირეულს ეძღვნება, რომლის მთავარ თემას გლობალური მიზნების თაობა წარმოადგენს (Global Goals Generation). კვირეულის ფარგლებში, ქვეყნის მასშტაბით, სხვადასხვა ღონისძიება იგეგმება, მათ შორის, თბილისის გამწვანებისთვის, 550 ხე დაირგვება.
