ზუგდიდის საკრებულოს შენობაში ხმაურია.
ზუგდიდის ახლადარჩეული საკრებულოს მოშიმშილე წევრებმა, ფრაქცია ენმ-ის ოთახიდან საკრებულოს სხდომათა დარბაზში გადაინაცვლეს, თუმცა ამ გადაწყვეტილებას ხმაური და წინააღმდეგობა მოჰყვა.
საკრებულოს დეპუტატებს ლეიბების ფრაქციის ოთახიდან სხდომათა დარბაზში გადატანის უფლებას დაცვა არ აძლევდა.
საბოლოოდ, მოშიმშილე დეპუტატებმა სხდომათა დარბაზში პირადი ნივთების გადატანა მოახერხეს, თუმცა მას შემდეგ, რაც სხდომა დაიწყო მათ სხდომათა დარბაზი პოლიციის ძალით დაატოვებინეს.
საკრებულოს ერთ-ერთი მოშიმშილე ოპოზიციონერი წევრი, რომელიც პოლიციას არ დაემორჩილა და ადგილი ძალის გამოყენებით დაატოვებინეს, შეუძლოდ გახდა. საკრებულოში სასწრაფო დახმარების ჯგუფის გამოძახება გახდა საჭირო.
ენმ-ის წევრის, მოშიმშილე მაია კალანდიას თქმით, მათ ფრაქციის ოთახიდან, სხდომათა დარბაზში იმიტომ გადაინაცვლეს, რომ ბიუჯეტის პროექტის განხილვის დაჩქარების გაპროტესტება სურდათ.
ოპოზიციონერი დეპუტატები ამბობენ, რომ “ოცნების” წევრები ბიუჯეტის საკუთარ ინტერესებზე მორგებას ცდილობენ და ამიტომ ჩქარობენ მის დამტკიცებას.
ენმ-ის წევრი, ანა წითლიძე აცხადებს, რომ გაუგებარია თუ რატომ უნდა მიიღონ 2022 წლის ბიუჯეტი ძველი საკრებულოს წევრებმა.
“აპირებენ დაჩქარებული წესით მიღებას. პირველ რიგში აღვნიშნავ, ადგილობრივი თვითმმართველობის კოდექსის მიხედვით ბიუჯეტის მიღების ბოლო ვადა არის 30 დეკემბერი.
ზუგდიდის საოლქო საარჩევნო კომისიას არჩევნების შეჯამებიდან 30 დღის განმავლობაში შეუძლია ჩანიშნოს პირველი ახლად არჩეული საკრებულოს სხდომა – რაც ნიშნავს იმას რომ ახლად არჩეული საკრებულოები ეტევიან ყველანაირ სამართლებრივ ვადებში განიხილონ და დაამტკიცონ 2022 წლის ბიუჯეტი.
თუმცა დღეს მივიღეთ რეალობა, როდესაც საკრებულოებში უმცირესობაში გადასული მმართველი პარტია იღებს გადაწყვეტილებას, განიხილავს და ემზადება 2022 წლის ბიუჯეტის დაჩქარებული წესით მისაღებად, იმის შიშით რომ საკრებულოში მათ არა აქვთ უმრავლესობა და ახალი საკრებულოების პირობებში ბიუჯეტის ორჯერ ჩავარდნას შეიძლება მოყვეს რიგგარეშე არჩევნები”.- აცხადებს წითლიძე.
