საქართველოს ტყეების დაცვის მნიშვნელობასთან დაკავშირებით გარემოსდაცითი განათლებისა და ინფორმაციის ცენტრი 5 საინტერესო ფაქტს აქვეყნებს:
1. ტყეებს საქართველოს ტერიტორიის 40 %-ს უჭირავს, აქედან 98% მთის ტყეებია.
2. საქართველოს ტყეები ყოველწლიურად დაახლოებით 180-190 მილიონ ტონამდე ჰაერის მტვერს ფილტრავს, შთანთქავს 41,5 მილიონ ტონა ნახშირორჟანგს და გამოყოფს 36 მილიონ ტონა ჟანგბადს;
3. საქართველოს ტყეებში გავრცელებული სახეობებიდან ყველაზე დიდი ოდენობით ჟანგბადს ალვის ხე გამოყოფს.
4. საქართველოში გავრცელებული 400-მდე მერქნიანი სახეობიდან 61 საქართველოს, ხოლო 43 კავკასიის ენდემია;
5. საქართველოს ტყეების ბუნებრივი უნიკალურობა აღიარებულია ველური ბუნების დაცვის მსოფლიო ფონდის (WWF) მიერ.
”მსოფლიო მასშტაბით მზარდი ტექნოლოგიური და სამრეწველო განვითარების ტემპის კვალდაკვალ იზრდება ადამიანის ნეგატიური ზემოქმედება გარემოზე, რაც ატმოსფერული ჰაერის, წყლისა და ნიადაგის დაბინძურებაში გამოიხატება.
ამ პირობებში განსაკუთრებულ მნიშვნელობას იძენს საზოგადოებაში გარემოსდაცვითი განათლების პრინციპების დანერგევა.
რა არის გარემოსდაცვითი განათლება?
გარემოსდაცვითი განათლება კომპლექსური სწავლებაა, რომელიც საზოგადოებაში გარემოსდაცვით შეგნებას, ღირებულებებს და უნარ-ჩვევებს აყალიბებს. მისი მთავარი მიზანი გარემოს მდგომარეობაზე ადამიანის ქმედების ზეგავლენის შესწავლა და კვლევა, გარემოსდაცვითი პრობლემებისა და მათი მოგვარების გზების, ბუნებრივი გარემოს შენარჩუნების, დაცვისა და გაუმჯობესების საშუალებების ძიებაა.
სხვა მნიშვნელოვან საკითხთებთან ერთად, გარემოსდაცვით განათლებას განსაკუთრებული როლი უჭირავს ტყის რესურსის დაცვასა და მის რაციონალურად გამოყენებაში.
გარემოს დაცვისა და სოფლის მეურნეობის სამინისტროს გარემოსდაცვითი განათლებისა და ინფორმაციის ცენტრი ახორციელებს გარემოსდაცვითი განათლების პრინციპების დანერგვას როგორც სკოლამდელ, ასევე უმაღლეს და პროფესიულ სასწავლებლებში.
გვახსოვდეს, რომ გარემოზე უარყოფითი ზემოქმედების შემცირების მიზნით ჩვენი ცხოვრების სტილისა და განვითარების ფორმების შეცვლით, ჩვენ შეგვიძლია თავიდან ავიცილოთ მოსალოდნელი ეკოლოგიური კრიზისი.” – ვკითხულობთ გარემოსდაცვითი განათლებისა და ინფორმაციის ცენტრის გვერდზე.
