“ძალიან სამწუხარო და უკიდურესად შემაშფოთებელია, როგორც სახელმწიფოებრივი შეფასებით, ისე ქრისტიანული აღქმით ძალადობა, ცემა და უკანონობა, რაც დღეს საქართველოში დატრიალდა.
რასაკვირველია, ეს იყო მოსალოდნელი და ამას საჯაროდ თუ პირად საუბრებში პროგნოზირებდნენ საღად მოაზროვნე პიროვნებები.
ეს დიდი ალბათობით იცოდნენ (ან უეჭველად უნდა სცოდნოდათ) მათ, ვინც ქვეყანაში ადამიანებისადმი მასობრივი მოწოდება მოახდინეს ქუჩაში გამოსვლაზე.
რა თქმა უნდა, ქრისტიანული რწმენისა და მორალიდან გამომდინარე, ყოველ ქრისტიანს აქვს უფლება, რომ თავისი რწმენისათვის მიუღებელი საჯარო ქმედებები ასევე საჯაროდ გააპროტესტოს, თუმცა, მხოლოდ მშვიდობიანად და ლოცვით და არცერთ შემთხვევაში სხვა ფორმით. ის, რაც დღეს მოხდა, ამას არაფერი აქვს ქრისტიანობასა და მის წმიდა სამოციქულო ეკლესიასთან, არამედ, თავად ქრისტიანობასა და ეკლესიას მიაყენეს დღეს შეურაცხყოფა მათ, ვინც ადამიანები სცემეს და სხვა ფორმით იძალადეს.
ეს არის ხილული რეზულტატი საქართველოში უკანასკნელი ოცდაათი წლის მანძილზე ნაქადაგები ფსევდოქრისტიანობის, ფსევდოეკლესიურობის, რომელიც მთლიანად დაცლილია ქრისტიანობისა და საეკლესიო სწავლებათა რეალური გააზრებისგან და ეს მოსაზრება სამწუხაროდ ფაქტებით გამყარებულია.
გარდა ამისა, საქართველოს სახელმწიფოებრიობას, ქვეყნის კონსტიტუციას დღეს მიადგა უდიდესი დარტყმა და ამის წამხალისებლები, სამწუხაროდ, ზედა ეშელონებში არიან. ეს არ არის გზა არც ქრისტიანობისაკენ და არც სახელმწიფოებრიობისკენ, არამედ ეს არის გზა სრული დასასრულისაკენ, რომელიც ამ ქვეყნის სახელმწიფოებრივად და ჯანსაღად მოაზროვნე საზოგადოებამ არ უნდა დაუშვას!
დღეს კიდევ მწვავედ გამოჩნდა, რომ ჩვენი ქვეყანა უდიდესი გამოწვევების წინაშეა და გზა ამ გამოწვევების დაძლევისთვის იმაზე გრძელი და რთულია, ვიდრე ხილულად დღემდე სჩანდა, თუმცა არა დაუძლეველი და მჯერა, რომ საქართველო აუცილებლად გავა თავისი სახელმწიფოებრიობის სამშვიდობოზე, სადაც ქრისტიანობისა და საეკლესიო სწავლებების რეალური, ჯანსაღი და ფანატიზმისგან სრულიად დაცლილი აღქმა თავის მნიშვნელოვან როლს შეასრულებს.” – წერს ლაშა დეისაძე-შარვაშიძე სოცუიალურ ქსელში.
