„ყველაზე მთავარი გამოწვევა არის, რომ არ დავთვალოთ ტურისტების რაოდენობა და დავთვალოთ ის შემოსავლები, რომელსაც მივიღებთ ტურისტული ბიზნესიდან“, -ამის შესახებ ეკონომიკის მინისტრის ახალმა კონსულტანტმა ვალერი ჩეხერიამ რადიო „პალიტრისა“ და „პალიტრანიუსის“ გადაცემაში „საქმე“ განაცხადა.
მისი თქმით, საქართველოს დღესაც კი, პოსტ-პანდემიურ პირობებში აქვს იმის პოტენციალი, რომ მოიზიდოს ტურისტები, შესთავაზოს მათთვის საინტერესო მიმართულებები და პარალელურ რეჟიმში იმუშაოს ინფრასტრუქტურის გაუმჯობესებაზე.
როგორც ვალერი ჩეხერიამ აღნიშნა, ახლა არ არის იმის დრო, რომ ჯერ ქვეყანა მოემზადოს და შემდეგ მოიზიდოს ტურისტები – “ ჩვენ შეგვიძლია დავახვედროთ ის, რაც გვაქვს და სწორად შევფუთოთ“.
ჩვენთან არის ძალიან ბევრი ის ნიშა, რომელიც დღეს გამოუყენებელია ტურიზმის მიმართულებით. ეს არის გასტრონომიული ტურიზმი. დღეს საქართველოში და განსაკუთრებით პანდემიის დაწყების შემდეგ, ყველაზე მეტად ხდება ყურადღების გამახვილება სუფთა საკვების მიწოდებაზე. ამას ძალიან ბევრი მომხმარებელი მოჰყვება, რომელიც მზად არის გადაიხადოს, იმიტომ, რომ იცის, სუფთა საკვები არ არის იაფი. ამიტომ ძალიან კარგად შეგვიძლია გამოვიყენოთ ის ფერმერული მეურნეობები, რომელიც მიბმული იქნება სასტუმროს ბიზნესზე და იმ ეკო-ტურისტულ მიმართულებებზე, რომელიც საქართველოს ძალიან ბევრი აქვს. მაგალითად, აბასთუმანი. ყოველთვის ვიცოდით, რომ ფილტვებისთვის იყო ძალიან კარგი სამკურნალო მიმართულება და ჩამოდიოდნენ სამკურნალოდ. ზუსტად ეს დაავადებაც, ვგულისხმობ პანდემიას, ფილტვებს უკავშირდება და დარწმუნებული ვარ, ამის მარკეტინგულად სწორად შეფუთვა, კარგ შედეგს მოგვცემს. დავოსი და აბასთუმანი – მსოფლიოში ეს ორი კურორტია უნიკალური, სადაც არის ნული ბაქტერია. ჩვენ შეგვიძლია, რომ ეს წინ წამოვწიოთ“,- განაცხადა ვალერი ჩეხერიამ.
მისი თქმით, საზოგადოებამ უნდა ისწავლოს პანდემიასთან თანაცხოვრება ისე, რომ ტურიზმის განვითარებაც შესაძლებელი იყოს.
„ჩვენ უნდა ვისწავლოთ თანაცხოვრება პანდემიასთან, რა თქმა უნდა, გავითვალისწინოთ ის რეკომენდაციები, რომელსაც ეპიდემიოლოგები გვაძლევენ და არ გავავრცელოთ. ამასთან, ვაქცინაცია იქნება ნომერ პირველი ამოცანა, თუმცა შეიძლება პანდემიასთან ერთად ჩატარდეს და მოვიზიდოთ კონფერენციები და გამოვიყენოთ ჩვენი პოტენციალი.
დღეს არ გვაქვს იმის ფუფუნება, რომ დაველოდოთ ჯერ ინფრასტრუქტურის მოწყობას და შემდეგ ტურიზმის მოზიდვას. ეს ყველაფერი პარალელურ რეჟიმში უნდა განხორციელდეს. ჩემი, როგორც კონსულტანტის რეკომენდაციები ამ მიმართულებით არის, რომ იდენტიფიკაცია გავაკეთოთ, სად შეიძლება მივიღოთ მაღალმხარჯველი ტურისტი, მხოლოდ იმ რეგიონებზე გავაკეთოთ აქცენტი და შევთავაზოთ და სად შეიძლება მივიღოთ ექსტრემის მოყვარული მოგზაურები, რომელსაც ცუდი გზა, იგივე უსინათლობა მოსწონს… ასეთი მოგზაურებიც არიან, ვინც დავუშვათ „დროში მოგზაურობს“, ე.წ. ექსტრემ ტურისტები არიან. პარალელურ რეჟიმში კი აუცილებლად ვიმუშავებთ ახალი პროდუქტების, ახალი მიმარულებების შექმნაზე. თუნდაც მომავალი წლისთვის მოვემზადოთ, რომ ტურისტებს ახალი ქალაქები, სოფლები შევთავაზოთ, რომელსაც აქვს ბევრი შეთავაზება, ტალახიდან დაწყებული, დამთვრებული ისეთი უნიკალური მიმართულებებით, როგორიც არის ბახმარო, აბასთუმანი… დღეს არ შეგვიძლია და არ გვაქვს დრო, ვიფიქროთ, რა დავახვედროთ, დღეს შეგვიძლია რომ დავახვედროთ ის, რაც გვაქვს და სწორად შევფუთოთ“,- განაცხადა ვალერი ჩეხერიამ.
