ინგლისში, უელსსა და შოტლანდიის უმეტეს ნაწილში დღეიდან კორონავირუსის გამო დაწესებული შეზღუდვები მსუბუქდება.
მილიონობით ადამიანს დახურულ სივრცეებში თავშეყრის (თუმცა შეზღუდული რაოდენობით), ერთმანეთთან ჩახუტებისა და პაბებსა და რესტორნებში შესვლის საშუალება ეძლევა.
უქმდება საზღვარგარეთ მოგზაურობაზე დაწესებული აკრძალვაც, თუმცა გარკვეული წესები ძალაში რჩება.
აღსანიშნავია, რომ ინგლისსა და შოტლანდიაში ნებისმიერ მოქალაქეს, მაშინაც კი, თუკი ვირუსის სიმპტომი არ აქვს, შეუძლია უფასო ტესტი გაიკეთოს, რომელიც შედეგს 30 წუთში იძლევა. უელსსა და ჩრდილოეთ ირლანდიაში კი უფასო ტესტები მოქალაქეების მხოლოდ გარკვეული ნაწილისთვისაა ხელმისაწვდომი, მაგალითად, მათთვის, ვისაც სახლიდან მუშაობა არ შეუძლია.
მიუხედავად იმისა, რომ ინგლისში, შოტლანდიასა და უელსში „ლოქდაუნი“ მსუბუქდება, ცვლილებები თითოეული მათგანისთვის განსხვავებულია. შოტლანდიის ორ რეგიონში კი – გლაზგოსა და მორეიში- შემთხვევების ზრდის გამო შეზღუდვები არ მსუბუქდება.
გაერთიანებული სამეფოს პრემიერ-მინისტრმა ბორის ჯონსონმა მოქალაქეებს სიფრთხილის გამოჩენისა და კვირაში ორჯერ ტესტის ჩატარებისკენ მოუწოდა.
„მოვუწოდებ ყველას, გამოიჩინოს სიფრთხილე და პასუხისმგებლობით მოეკიდოს ახალ თავისუფლებას. ყველამ უნდა შეასრულოს საკუთარი როლი კვირაში ორჯერ ტესტის გაკეთებით, ვაქცინაციით და იმით, რომ ახსოვდეს: ხელები, სახე, სივრცე და სუფთა ჰაერი,“- განაცხადა ბორის ჯონსონმა.
