27 სექტემბერი საქართველოში გლოვის, ხსოვნისა და იმედის დღეა. სოხუმის დაცემიდან დღეს 26 წელი გავიდა. ამ დღესთან დაკავშირებით ქუთაისში, ქალაქის მერმა გიორგი ჭიღვარიამ,იმერეთში სახელმწიფო რწმუნებულმა ზვიად შალამბერიძემ და ადგილობრივი ხელისუფლების წარმომადგენლებმა ნინოშვილის სკვერში მდებარე მემორიალი ყვავილებით შეამკეს და აფხაზეთის ომში დაღუპული გმირების ხსოვნას პატივი მიაგეს. მათივე თქმით 27 სექტემბერი თანამედროვე საქართველოს თითოეული მოქალაქისთვის ყველაზე მძიმე და მტკივნეული დღეა.
მემორიალთან აფხაზეთის ომის ვეტერანებიც იმყოფებოდნენ. მათ 26 წლის წინ მომხდარი მოვლენები გაიხსენეს.
სამხედრო დაპირისპირება აფხაზეთში 1992 წლის 14 აგვისტოს დაიწყო. კონფლიქტი ქართულ სამთავრობო ჯარებსა და აფხაზ სეპარატისტთა ძალებს შორის 13 თვესა და 13 დღეს გრძელდებოდა.
ქართული მხარის ამ დრომდე დაუზუსტებელი მონაცემებით, ომში 10 ათასზე მეტი ქართველი ჯარისკაცი და მშვიდობიანი მოქალაქე დაიღუპა. 300 ათასი აფხაზეთიდან დევნილი კი უსახლკაროდ დარჩა.
