ინდოეთის დედაქალაქ დელიში ათასობით ფერმერის მიერ გამართული საპროტესო აქცია ძალადობაში გადაიზარდა, – ამის შესახებ ინფორმაციას Aljazeera ავრცელებს.
გამოცემის ცნობით, პოლიციამ მომიტინგეების წინააღმდეგ, რომლებიც ბარიკადების გარღვევას შეეცადნენ, ცრემლსადენი გაზი და ხელკეტები გამოიყენა.
შეტაკებები მას შემდეგ დაიწყო, რაც ფერმერები, რომლებიც „ტრაქტორების აქციას“ აწყობდნენ, შეეცადნენ, დედაქალაქში, „ინდოეთის რესპუბლიკის დღესთან“ დაკავშირებით მიმდინარე ღონისძიებებს შეერთებოდნენ. ისინი ქალაქში შესვლას გარეუბნიდან გეგმავდნენ, სადაც ორ თვეზე მეტი ხნის განმავლობაში იყვნენ დაბანაკებული.
სამართალდამცავებმა დედაქალაქისკენ მიმავალი რამდენიმე გზა ლითონისა და ბეტონის ბარიკადებითა და სატვირთო ავტომობილებით ჩაკეტეს ისე, რომ ფერმერებს მხოლოდ ხელისუფლების მიერ ნებადართული მარშრუტების გავლა შეძლებოდათ. ფერმერებმა ბარიკადების გარღვევა გადაწყვიტეს, რის შემდეგაც პოლიციამ მათ წინააღმდეგ ცრემლსადენი გაზი და ხელკეტები გამოიყენა.
ცნობისათვის, ინდოეთში ფერმერები მთავრობის მიერ განხორციელებულ სოფლის მეურნეობის რეფორმებს აპროტესტებენ. ისინი აცხადებენ, რომ რეფორმების ფარგლებში მიღებულ კანონებს მსხვილი, კერძო მყიდველებისთვის სარგებელი მათ ხარჯზე მოაქვს.
