შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი საჩხერისა და ონის მუნიციპალიტეტების გამყოფი ხაზის სოფლებს ეწვია. თეა ახვლედიანი სოფელ პერევის საოკუპაციო ხაზზე იმყოფებოდა და ბლოგ-პოსტთან არსებულ ვითარებას ადგილზე გაეცნო. ამასთან, სახელმწიფო მინისტრი გამყოფი ხაზის სოფლების მოსახლეობასაც შეხვდა, მათი საჭიროებები მოისმინა და ადგილობრივი თვითმმართველობის წარმომადგენლებთან ერთად მათი მოგვარების გზებზე იმსჯელა.
როგორც შერიგებისა და სამოქალაქო თანასწორობის საკითხებში სახელმწიფო სამინისტროში აცხადებენ, სოციალური დახმარების კამპანიის ფარგლებში, თეა ახვლედიანმა იმერეთის სახელმწიფო რწმუნებულთან ზვიად შალამბერიძესთან და რაჭის სახელმწიფო რწმუნებულის მოვალეობის შემსრულებელთან გიორგი მაქარაშვილთან ერთად, ობოლ და შეზღუდული შესაძლებლობების მქონე ბავშვებს საკვები პროდუქტებისა და ჰიგიენური საშუალებების კალათები გადასცა.
უწყების ცნობით, სახელმწიფო მინისტრის აპარატის ინიციატივით, კორონავირუსთან დაკავშირებით საინფორმაციო/ცნობიერების ამაღლების კამპანია და პანდემიის ფონზე, სოციალური დახმარების აქცია, 8 რეგიონში განხორციელდა. საკვები პროდუქტებისა და ჰიგიენური საშუალებების კალათები, გაეროს ბავშვთა ფონდის UNICEF-ის მხარდაჭერით, გადაეცათ როგორც მცხეთის, შიდა ქართლის, იმერეთის, რაჭისა და სამეგრელოს რეგიონებში საოკუპაციო ხაზის მიმდებარე სოფლებში, ასევე სამცხე-ჯავახეთში, ქვემო ქართლსა და კახეთში ეთნიკური უმცირესობებით მჭიდროდ დასახლებულ მუნიციპალიტეტებში მცხოვრებ ობოლ და შეზღუდული შესაძლებლობების მქონე ბავშვებს. ეთნიკური უმცირესობების წარმომადგენლებისთვის შესაბამისი ბეჭდური სინფორმაციო მასალის მიწოდება, სახელმწიფო მინისტრის აპარატმა, აშშ-ის განვითარების სააგენტოს USAID-ის მხარდაჭერით განახორციელა.
ასევე, კოვიდპანდემიის ფონზე, სოციალური დახმარება გაეწიათ კონფლიქტით დაზარალებულ 116-ვე სოფელში მცხოვრებ სოციალურად დაუცველ მრავალშვილიან ოჯახებსა და მარტოხელა მოხუცებს.
„მიმდინარე კვირას ჩვენ ვამთავრებთ, როგორც გამყოფი ხაზების მიმდებარედ, ისე ეთნიკური უმცირესობებით კომპაქტურად დასახლებულ, ჯამში 8 რეგიონში სახელმწიფო მინისტრის აპარატის საინფორმაციო და სოციალური დახმარების კამპანიას, რომელიც კორონავირუსის პანდემიით გამოწვეულ საჭიროებებზე საპასუხოდ განვახორციელეთ. ამ აქციას ვასრულებთ საჩხერისა და ონის მუნიციპალიტეტების შესაბამის სოფლებში ვიზიტით, სადაც ვეწვიეთ იმ ოჯახებს, რომელთაც განსაკუთრებით ესაჭიროებათ ჩვენი თანადგომა, რაც განხორციელდა გაეროს ბავშვთა ფონდის UNICEF-ის მხარდაჭერით. ასევე, აღსანიშნავია, რომ ვეწვიე სოფელ პერევს, სადაც შევხვდით ადგილობრივ მოსახლეობას, განვიხილთ მათ წინაშე მდგარი პრობლემები. პირადად ვეწვიე სოფელ პერევის საოკუპაციო ხაზს და ადგილზე გავეცანი მიმდინარე ოკუპაციით შექმნილ რთულ ვითარებას. აღნიშნული რეგიონების ადგილობრივი ხელისუფლების წარმომადგენლებთან ერთად ვიმსჯელეთ მოსახლეობის წინაშე მდგარი ამოცანების, გამოწვევების გადაჭრის შესაძლო გზებზე და სახელმწიფო მინისტრის აპარატი მის კომპეტენციაში შემავალი ორივე პოლიტიკის განხორციელების პროცესში, ბუნებრივია, კვლავაც განაგრძობს მოსახლეობის საჭიროებებზე ზრუნვას“- განაცხადა სახელმწიფო მინისტრმა.
