სოფელ ყანდაურაში მომხდარი მკვლელობის საქმეზე დაკავებული ნოდარ გამყრელიძე, რომელსაც ბრალი დაუმძიმეს და დედასთან ერთად კიდევ 4 პირის განზრახ მკვლელობას ედავებიან, აღნიშნულ ბრალს არ აღიარებს, – ამის შესახებ „ინტერპრესნიუსს“ გამყრელიძის ადვოკატმა გიორგი ქართველიშვილმა განუცხადა.
როგორც ქართველიშვილი განმარტავს, მომხდართან დაკავშირებით ნოდარ გამყრელიძე კვლავ არ საუბრობს და ბრალს ისევ არ აღიარებს.
თუ რის საფუძველზე მოხდა დაკავებულისთვის ბრალის დამძიმება, ამ კითხვაზე ადვოკატს პასუხი არ აქვს და აცხადებს, რომ არ იცის.
ადვოკატის განმარტებით, მისი დაცვის ქვეშ მყოფს ბრალის წარდგენიდან დღემდე მხოლოდ დედის მკვლელობას ედავებოდნენ, დამძიმებული ბრალის მიხედვით კი უკვე ოჯახის დანარჩენი წევრების დ მეზობლების მკვლელობასაც ედავებიან.
გამოძიების ინფორმაციით, ნოდარ გამყრელიძემ ავტომატური ცეცხლსასროლი იარაღიდან გასროლით სიცოცხლისთვის სახიფათო დაზიანებები მიაყენა ოჯახის სხვა წევრებს – 1965 წელს დაბადებულ დ.გ.-ს, 1982 წელს დაბადებულ შ.გ.-ს, ასევე, მეზობლებს – 1975 წელს დაბადებულ ლ.ს.-ს და 1950 წელს დაბადებულ მ.მ.-ს, რომლებიც ადგილზე გარდაიცვალნენ. დანაშაული 16-დან 20 წლამდე ან უვადო თავისუფლების აღკვეთას ითვალისწინებს. პოლიციამ ნივთმტკიცებებად ამოიღო დანაშაულის ჩადენის იარაღები.
ცნობისთვის, ყანდაურაში მკვლელობა გასული წლის 3 მაისს მოხდა. შსს-ს მიერ თავდაპირველად გავრცელებული ინფორმაციით, 85 წლის ომარ გამყრელიძემ ცეცხლსასროლი იარაღით შვილი, რძალი და ორი მეზობელი მოკლა, ავადმყოფი მეუღლე კი დაჭრა, რომელიც მოგვიანებით გარდაიცვალა.
ომარ გამყრელიძეს სასამართლომ აღკვეთის ღონისძიების სახით პატიმრობა შეუფარდა. მოგვიანებით ის 2000-ლარიანი გირაოთი გაათავისუფლეს. ამავე საქმეზე ბრალდებულ ომარ გამყრელიძის შვილიშვილიც დააკავეს. მას იარაღის უკანონო – შეძენა – შენახვას ედავებოდნენ. გასული წლის ნოემბერში პატიმრობიდან ისიც გათავისუფლდა.
