იმერეთში კოვიდ 19-ის ახალი შემთხვევები არ გამოვლენილა. ქუთაისის ლაბორატორიამ იმერეთისა და ქვემო სვანეთის სამედიცინო დაწესებულებებიდან 12 საეჭვო პაციენტის ანალიზი გამოიკვლია და ყველა პასუხი უარყოფითია.
დაავადებათა კონტროლის იმერეთის სამმართველოს უფროსის, გოჩა გიორგიძის თქმით, დღეს იმერეთის რეგიონში არსებული საკარანტინო სივრცეებიდან 129 პირი გავიდა და კარანტინში ამჟამად 267 მოქალაქე იმყოფება.
ერთ-ერთი საკარანტინო სივრციდან 1 პირი ვირუსისთვის დამახასიათებელი სიმპტომებით სტაციონარში გადაიყვანეს.
ამ დროისთვის იმერეთში კოვიდ 19-ით 25 პაციენტი მკურნალობს. 24 ქუთაისის ინფექციურ საავადმყოფოში, ხოლო ერთი საჩხერის სამედიცინო ცენტრში.
საქართველოში კორონავირუსი 348 ადამიანს დაუდასტურდა, აქედან 74 უკვე გამოჯანმრთელდა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.
