უნდა გავითავისოთ როგორ მოვიქცევით თითოეული ჩვენთაგანი ამ 2 კვირის განმავლობაში, როგორ ავარიდებთ თავს დიდ თავყრილობებს, იქნება ეს ოჯახებში, ეკლესიებში, სასაფლაოებზე თუ სხვაგან, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.
მისივე ინფორმაციით, მიმდინარეობს კონსულტაციები საქართველოს ეკლესიასთან, რომელიც „მხოლოდ ხელს უწყობდა და უწყობს ერის განვითარებას, ჯანმრთელობას და განათლებას”.
„კვირას იქნება აღდგომის დღესასწაული, რომელსაც ჩვენ ყოველთვის ვზეიმობთ საქართველოში, ისევე როგორც მთელს მსოფლიოში აღდგომა აღინიშნება. ბევრი კითხვა შემოდის თუ როგორ უნდა აღინიშნოს აღდგომის დღესასწაული. დასამალი არ არის, რომ მიმდინარეობდა და მიმდინარეობს კონსულტაციები საქართველოს ეკლესიასთან, რომელიც წლების განმავლობაში გახლავთ ყველაზე მაღალრეიტინგული და აღიარებული ინსტიტუცია ქვეყანაში. ის მხოლოდ ხელს უწყობდა და უწყობს ერის განვითარებას, ჯანმრთელობას და განათლებას“, – განაცხადა ამირან გამყრელიძემ.
ამირან გამყრელიძის აზრით, საპატრიარქოსთან მოლაპარაკებებით „ოქროს შუალედი“ გამოიძებნება და ეს ორი კვირა არ მიაყენებს ზიანს ჩვენი მოსახლეობის ჯანმრთელობას.
„ეს 2 კვირა ვნების და შემდეგ ბრწყინვალე შვიდეულის იქნება რთული, მაგრამ ჩვენ უნდა ვისწავლოთ კორონავირუსთან ერთად ცხოვრება. ეს ადვილად მოსავლელი დაავადება არ არის, ამიტომ უნდა გავითავისოთ როგორ მოვიქცევით თითოეული ჩვენთაგანი ამ 2 კვირის განმავლობაში, როგორ ავარიდებთ თავს დიდ თავყრილობებს იქნება ეს ოჯახებში, ეკლესიებში, სასაფლაოებზე თუ სხვაგან. დარწმუნებული ვარ, რომ ოქროს შუალედი და კონსენსუსი გამოიძებნება და ეს ორი კვირა არ მიაყენებს ზიანს ჩვენი მოსახლეობის ჯანმრთელობას, არ იქნება ხელშემწყობი ქვეყანაში ფართომასშტაბიანი ეპიდემიის დაწყების“, – აღნიშნა ამირან გამყრელიძემ.