ქუთაისის ინფექციურ საავადმყოფოში კორონავირუსის დიაგნოზით ხუთი ახალი პაციენტია მოთავსებული, მათი მდგომარეობა საშუალო სიმძიმისაა. ხუთი პაციენტიდან ერთი ქალი ვანის კლასტერიდანაა, ერთი- ფარცხანაყანების კლასტერიდან, ასევე არიან ბებია და 5 წლის შვილიშვილი ქობულეთის კლასტერიდან და ახალგაზრდა მამაკაცი ქუთაისიდან, რომელიც ე.წ. ცხელების ცენტრიდან გადაიყვანეს. კლინიკის ექიმის თემურ ნადირაძის ინფორმაციით, პაციენტები ბოქსირებულ განყოფილებაში არიან და მკურნალობა უტარდებათ.
სულ ამ დროისთვის ქუთაისის ინფექციურ საავადმყოფოში კორონავირუსით ინფიცირებული 17 მოქალაქე მკურნალობს, მათ ნაწილს პნევმონია აქვს. ამასთან, უარყოფითი პასუხი აქვს პირველ პაციენტს და თუ განმეორებითი ტესტი ისევ უარყოფით პასუხს აჩვენებს, კლინიკიდან გაეწერება.