ამერიკის შეერთებული შტატების 104 წლის მოქალაქემ, ბილ ლაფშისმა COVID-19 დაამარცხა. ორეგონის შტატში მდებარე ედვარდ ოლვორთის სახელობის ვეტერანთა სახლში მცხოვრები ლაფშისი მსოფლიოში ყველაზე ხანდაზმული ადამიანია, ვინც კორონავირუსით ინფიცირების შემდეგ გამოჯანმრთელება შეძლო.
მეორე მსოფლიო ომის ვეტერანს COVID-19-ის სიმპტომები 5 მარტს აღენიშნა, რის გამოც ის იზოლაციაში მოაქციეს. ლაფშისის მკურნალი ექიმის, რობ რიჩარდსონის განცხადებით, პაციენტს გაუმართლა, რადგან დაავადება მძიმე ფორმაში არ გადაზრდილა და რესპირატორული პრობლემები არ გამოუწვევია. საბოლოოდ, 25-დღიანი ავადმყოფობის შემდეგ, მამაკაცი გამოჯანმრთელდა და ვიწრო წრეში, სოციალური დისტანცირების ნორმების დაცვით, 104 წლის იუბილეც იზეიმა.
ბილ ლაფშისი ორეგონის შტატის ქალაქ სალემში 1916 წელს დაიბადა. აღსანიშნავია, რომ ის უვნებლად გადაურჩა 1918 წელს დაწყებულ ესპანური გრიპის პანდემიას, რომელსაც 50-დან 100 მილიონამდე ადამიანი შეეწირა და გამოიარა 1930-იანი წლების დიდი დეპრესია. 1943 წელს ლაფშისი ამერიკის შეერთებული შტატების შეიარაღებული ძალებში გაიწვიეს, რომლის შემადგენლობაშიც მეორე მსოფლიო ომის დროს ალეუტის კუნძულებზე მსახურობდა. ცოლი 2001 წელს, 60-წლიანი თანაცხოვრების შემდეგ გარდაეცვალა. ჰყავს ორი ქალიშვილი.
ლიფშისი საუკუნეზე უფროსი ასაკის ერთადერთი პაციენტი არ არის, რომელმაც კორონავირუსის დამარცხება შეძლო. 103 წლის ჩინელი ქალბატონი ჟანგ გუანფენი ქალაქ უხანის საავადმყოფოდან 6-დღიანი მკურნალობის შემდეგ გაეწერა. მანამდე დაავადებისგან ამავე ქალაქში მცხოვრები 101 წლის მამაკაციც განიკურნა. COVID-19 დაამარცხა ასევე რიმინის მკვიდრმა 101 წლის იტალიელმა მამაკაცმა, რომელიც მსოფლიომ მისტერ პის სახელით გაიცნო.
ედვარდ ოლვორთის სახელობის ვეტერანთა სახლში COVID-19-ის დადასტურებული შემთხვევები პირველად მიმდინარე წლის მარტში დაფიქსირდა. ინფიცირებულთა რიცხვს ხანდაზმულებთან ერთად დაწესებულების პერსონალის ნაწილიც შეემატა. სამწუხაროდ, დაავადებას იქ მცხოვრები 2 ადამიანი შეეწირა.
POPX.GE
