სტამბოლიდან საქართველოს მიმართულებით მოძრავი ავტობუსი, რომელშიც საქართველოს 54 მოქალაქე იმყოფება, თურქი სამართალდამცავების გადაწყვეტილებით, უკან, სტამბოლში დააბრუნეს.
„დაახლოებით, 2 საათის წინ გამოვედით სტამბოლიდან. გაგვაჩერა პოლიციამ და გვითხრეს, რომ გადაადგილების ნებართვა არ გვაქვს. ახლა უკან გვაბრუნებენ, პოლიციის ესკორტი მოგვყვება. მძღოლებს დოკუმენტი მოსთხოვეს, რაც არ ჰქონდათ. როგორც ამბობენ, ამ დოკუმენტს აქამდე არ ითხოვდნენ და დღეს პირველად მოითხოვეს. სტამბოლში გვაბრუნებენ, მაგრამ იმის გამო, რომ დოკუმენტს დღეს ვერ ავიღებთ, მთელი ღამით ავტობუსში გათენება მოგვიწევს. თქვენთან კომუნიკაციის შემდეგ დამირეკეს საკონსულოდან და შემოგვთავაზეს, რომ ბილეთები სხვა ავტობუსზე ვიყიდოთ ან ამავე ავტობუსით წამოვიდეთ, მაგრამ დოკუმენტის აღებას დაველოდოთ. თუ ბილეთებს თავიდან ვიყიდით ეს თითოეულ მგზავრს დამატებით 50 დოლარი დაგვიჯდება, რაც ჩვენთვის ზედმეტი და გაუთვალისწინებელი ხარჯია. მით უმეტეს, მე შვილთან ერთად მოვემგზავრები, რაც ჩემთვის ამ ხარჯს აორმაგებს. რა უნდა ვქნათ ამაღამ სტამბოლში, არ ვიცით“, – განუცხადა ლალი ხარხელმა „ინტერპრესნიუსს“.
საგარეო უწყების ინფორმაციით, მგზავრებს სტამბოლიდან წამოსვლა ხვალ შეეძლებათ.
„საკონსულო სამსახურს ჰქონდა კომუნიკაცია მოქალაქეებთან. თურქეთში, როგორც ცნობილია, შეზღუდულია შიდა გადაადგილება და სატრანსპორტო საშუალებას ესაჭიროება ყოველ ჯერზე შესაბამისი ნებართვის აღება. სტამბოლიდან საქართველოში მოქალაქეების გადმოყვანის უფლება მინიჭებული აქვს ერთ ტურისტულ კომპანიას, რომელსაც ამჯერად არ ჰქონდა აღებული გადაადგილების ერთჯერადი ნებართვა, შესაბამისად, არ მიეცა გადაადგილების საშუალება. აღნიშნულ ნებართვას კომპანია აიღებს ხვალ და მოქალაქეებს სურვილის შემთხვევაში ექნებათ გამომგზავრების უფლება“, – უთხრეს „ინტერპრესნიუსს“ საგარეო საქმეთა სამინისტროში.
