ქვეყანაში საგანგებო მდგომარეობის გამოცხადების წინაპირობა არსებული რისკები და საფრთხეებია. ქვეყანა დღითი დღე ახალი გამოწვევების წინაშე დგება. ”მეგა ტვ” დაინტერესდა, თუ როგორ აფასებს არსებულ ვითარებას ეროვნული და კორპორაციული უსაფრთხოების სასწავლო-კვლევითი ცენტრის თანადამფუძნებელი ისტორიის დოქტორი დავით კუხალაშვილი.
როგორ შეაფასებთ დღევანდელ სიტუაციას, რამდენად უსაფრთხოა ქვეყანაში შექმნილი მდგომარეობა?
ქვეყანაში შექმნილი ვითარება, მიუხედავად იმისა რომ ხელისუფლება და საზოგადოების მნიშვნელოვანი ნაწილი ინარჩუნებს წონასწორობას და სახელმწიფოებრივ მიდგომებს, მაინც საგანგაშოა, საზოგადოების იმ ნაწილის მხრიდან, რომლებიც ვერ ან არ გააცნობიერა და დღეის მდგომარეობითაც ვერ/ან არ აცნობიერებს მსოფლიოში და საკუთარ სახელმწიფოში შექმნილ ვითარებას კორონავირუსის (COVID-19) ეპიდააფეთქებისა და შემდგომ მის პანდემიად გამოცხადების არსს.
საგანგაშოდ და სახელმწიფოს კონსტიტუციურ წყობილებაზე დამაზიანებელ გარემოებად უნდა ჩაითვალოს, დესტრუქციით გამორჩეული პოლიტიკური პარტიების, კერძო პირებისა და მასმედიის სშუალებების მხრიდან დეზინფორმაციების გავრცელების მცდელობები, მათ შორის სახელმწიფოს რელიგიური უსაფრთხოების კუთხით.
საგანგაშოა ბიზნესის დამოკიდებულება მსოფლიოში და სახელმწიფოში არსებულ ვითარებასთან მიმართებაში, დაუსაბუთებელ ფასთა ზრდასთან მიმართებაში.
რა ტიპის საფრთხე შეიძლება გაჩნდეს ქვეყნისთვის, ამ ვითარებიდან გამომდინარე?
პრაქტიკულად საზოგადოების „დაუმორჩილებელი“ ნაწილი აღნიშნული ვირუსის გეომეტრიული პროგრესიით გავრცობის ხელსაყრელ პირობას ქმნის, რაც პროცესის სწორად ვერ მართვის შემთხვევაში სახელმწიფოს შრომისუნარიანი, ბრძოლისუნარიანი, ინტელექტუალური ძალის მასშტაბური შემცირების და ამ პროცესებზე თანმდევი სახელმწიფოს ეროვნულ უსაფრთხოებაზე დამაზიანებელი სხვა პროცესების მაინსპირირებელი გარემოება შეიძლება გახდეს. გამოთქმულ მოსაზრებას ამყარებს ღია წყაროებში და სპეციალისტთა მიერ გამოთქმული მოსაზრებები მასზედ რომ, ვირუსს განკურნებული ადამიანის მეორედ დასნებოვნების შესაძლებლობა ახასიათებს.
დეზინფორმაცია მოსახლეობაზე დამთრგუნველი ზემოქმედების გარდა ანარქიისაკენ მიდრეკილი ქმედებების მაპროვოცირებელ ნიშნებს შეიცავს.
ფასთა ზრდა, დესტრუქციულ პროპაგანდასთან ერთად მოსახლეობის ისეთი ქმედებების პროვოცირებასთანაა დაკავშირებული, როგორიცაა შიშისა და პანიკის საფუძველზე ყველა სახის საკვები პროდუქტების არასაჭირო რაოდენობით შესყიდვა და დეფიციტის შექმნა, რაც საბოლოო ჯამში ანტისახელისუფლებო გამოსვლებში და მასობრივ არეულობებში შეიძლება გადაიზარდოს.
თქვენი ცენტრის მიერ მსგავსი ტიპის საფრთხეებზე გქონდათ თუ არა აქცენტები. როგორია თავდაცვითი ქმედებები, რომელიც აუცილებელია გავითვალისწინოთ შექმნილ სიტუაციაში.
ჩვენი ცენტრის მიერ მასმედიის საშუალებებში არაერთი განცხადებაა ფიქსირებული მსოფლიოსა და საქართველოში არსებული საფრთხეების ირგვლივ. თუ გავითვალისწინებთ ცენტრის საქმიანობის პროფილს, ჩვენს მიერ ვითარება ფასდება სადაზვერვო ქმედებათა ჭრილში და ჩვენ მიერ უზრუნველყოფილ ტრენინგებზე დღევანდელ ვითარებასთან არსებულ ვითარების შესაბამის ისტორიულ მოვლენებზე განსაკუთრებული აქცენტი კეთდება. ჩვენი ცენტრის წევრების ისტორიის დოქტორის დავით კუხალაშვილის, აგრარულ მეცნიერებათა დოქტორის მზევინარ გურული-კუხალაშვილის, სოფლის მეურნეობის დოქტორის თამარ ბრეგაძის მიერ გამოცემულია მონოგრაფია: ტერორიზმის როლი სასურსათო უსაფრთხოების უზრუნველყოფაში, რომელშიაც განხილულია ისეთი მნიშვნელოვანი საკითხები, როგორიცაა: ინფექციური დაავადებების დინამიკის სადაზვერვო და კონტრსადაზვერვო ორგანიზაცია, აგროტერორიზმი, როგორც სადაზვერვო და კონტრსადაზვერვო უზრუნველყოფის ძირითადი მიმართულებები, მწერების როლი ეკოლოგიურ წონასწორობასა და სადაზვერვო საქმიანობაში, აგრეთვე სხვა საკითხები. ამავე მონოგრაფიაში მოყვანილია განხილულ მიმართულებებზე სადაზვერვო და კონტრსადაზვერვო საქმიანობის აგენტურულ-ოპერატიული მიზნების ზოგადი კლასიფიკატორი. აღნიშნული მონოგრაფია განსაკუთრებულ დახმარებას გაუწევს ჟურნალისტებსა და დღეის მდგომარეობით შექმნილი ურთულესი მდგომარეობის, ანალოგიური ვითარების შესწავლით დაინტერესებულ მკვლევარებს, საზოგადოებას, როცა მსოფლიო კორონავირუსს (COVID-19) დაამარცხებს, რათა გამოირიცხოს ან გამოვლინდეს ამ ვირუსის მიზანმიმართულ გავრცება, ან გამოიკვეთოს გავრცელების ხელშემწობი პირობები.
თქვენი რჩევა ან მთავარი საკითხი რაზეც გინდათ გაამახვილოთ ყურადღება – მთავარი გზავნილი.
დღევანდელ ვითარებაში საზოგადოებამ უნდა გამოიჩინოს განსაკუთრებული მორჩილება ხელისუფლებისადმი, რადგან სწორედ ამ სექტორში არის განთავსებული მნიშვნელოვანი, მათ შორის ანალიტიკური მონაცემები იმ რისკების, საფრთხეების შესახებ, რომლის წინაშეც ქართული სახელმწიფო დგას.
აუცილებელია შეიქმნას საინფორმაციო ბაზა იმ პირებისა და კომპანიების შესახებ, რომლებიც ამ რთულ პერიოდში სახელმწიფოს ინტერესების საწინააღმდეგოდ მოქმედებდნენ, რადგან ისინი ყოველთვის მოწყვლადნი არიან, როგორც უცხო ქვეყნების ინტერესის გამტარებლები. ამ მიმართულებით საკითხი აქტუალურია იმ თვალსაზრისით, რომ აქტიური საბრძოლო ვითარებების მიუხედავად დამოუკიდებელი საქართველო ორ ათეულ წელზე მეტია იმყოფება უმძიმესი სადაზვერვო ზეგავლენისა ქვეშ და საომარ ვითარებაში.
მინდა მშვიდობა და გამარჯვება გისურვოთ თქვენ, ვუსურვო საქართველოსა და მსოფლიოს ხალხებს კორონავირუსთან (COVID-19) ბრძოლაში.
მიტევება,მორჩილება, თანაგრძნობა და განსაკუთრებით სახელმწიფოებრივი აზროვნება, პროფესიონალიზმზე აქცენტის გაკეთება, ეს არის მნიშვნელოვანი საშუალებები საფრთხეების წინააღმდეგ საბრძოლველად.
ავტორი: თინათინ კიკაბიძე
