ტყიბულში, იმერეთის სატყეო სამსახურმა, მასშტაბური დარღვევა გამოავლინა. ამოღებულია 17 კუბურ მეტრამდე უკანონოდ მოპოვებული მერქანი, რომლის ტრანსპორტირებაც სახელმწიფო სანომრე ნიშნის გარეშე მოძრავი ავტომანქანით ხდებოდა.
ასევე დალუქულია არარეგისტრირებული სახერხი საამქრო და ტერიტორიაზე ნაპოვნი უნებართვო სანახშირეც. გარემოსთვის მიყენებული ზიანი დგინდება, საქმეს კი საგამოძიებო უწყებები შეისწავლიან.
” იმერეთის სატყეო სამსახურის თანამშრომლებმა, ტყიბულში, სახელმწიფო ტყეში ხე-ტყის უკანონო მოპოვებისა და ტრანსპორტირების ფაქტი გამოავლინეს. სამართალდამრღვევმა უკანონოდ მოიპოვა 17 კუბურ მეტრამდე სხვადასხვა სახეობის სამასალე მერქანი, რომლის ტრანსპორტირებაც სახელმწიფო სანომრე ნიშნის გარეშე ავტომანქანით განახორციელა. საკარმიდამო ნაკვეთში აღმოჩენილია დაურეგისტრირებელი სახერხი საამქრო და უნებართვო სანახშირე. საამქროს ტერიტორიაზეა განთავსებული პირველადი გადამუშავების პროდუქტი – ფიცარი. მიმდინარეობს გარემოზე მიყენებული ზიანის დაანგარიშება. ვინაიდან საქმე შეიცავს სისხლის სამართლის დანაშაულის ნიშნებს, მასალები, შემდგომი რეაგირების მიზნით, გადაიგზავნება შესაბამის საგამოძიებო უწყებაში.” – ნათქვამია სატყეო სამსახურის მიერ გავრცელებულ ინფორმაციაში.
