გუშინ შეურაცხყოფილად იგრძნო თავი ევროკავშირის ელჩმა, რომელიც საგარეო საქმეთა სამინისტროში იმყოფებოდა. როგორ თუ კითხვას სვამს ქართველი ხალხი, რაში ხარჯავენ ფულს და როგორ იშმუშნება ქართველი ხალხი, როცა გაიგებს, რომ პოლიტიკაში იხარჯება დანიელების ფული, – ამის შესახებ პარლამენტის თავმჯდომარემ, შალვა პაპუაშვილმა, პოლიტიკაში უცხოური დაფინანსების წინააღმდეგ კანონმდებლობის გამკაცრების თაობაზე დიდი ბრიტანეთის მთავრობის გადაწყვეტილებაზე საუბრისას განაცხადა.
როგორც შალვა პაპუაშვილმა ჟურნალისტებს განუცხადა, „უტიფრობა ის არის, რომ უცხო ქვეყნები საქართველოში ფულს ხარჯავენ, მაგრამ ამაზე რომ შენიშვნა უთხრა ან კითხვა დაუსვა, შეიცხადებენ და თავს შეურაცხყოფილად გრძნობენ“.
„შეგახსენებთ, რამდენიმე თვის წინ ბრიტანეთის ელჩმა გამოთქვა გაკვირვება და შეშფოთება იმის გამო, რომ არ მიეცა შესაძლებლობა ბრიტანეთის საელჩოს, რადიკალური ოპოზიციის პარტიული კედლის გაზეთი „ტაბულა“დაეფინანსებინა. ბავშვმაც კი იცის, რომ „ტაბულა“ არის პარტიული კედლის გაზეთი. ბრიტანეთის ელჩი ცდილობდა დაეფინანსებინა რადიკალების პარტიული კედლის გაზეთი. დღეს ახლა ბრიტანეთისგან ვიგებთ, რომ იმავე ქმედება ჩვენ რომ ბრიტანეთში განვახორციელოთ, სასტიკად უნდა დაგვსაჯონ და ამის შესაძლებლობას არ მოგვცემენ. ეს ხომ ერთადერთ რამეს აჩვენებს – ჩვენ გვიყურებენ, როგორც მეორეხარისხოვან ადამიანებს, ხალხს და ქვეყანას. ის „იუპიტერები“, რომლებსაც საკუთარი თავი წარმოუდგენიათ, რომ მათთან ეს არ უნდა მოხდეს, ბრიტანელმა ხალხმა უნდა გადაწყვიტოს და ქართველებს თურმე არ გვაქვს უფლება, რომ ბრიტანელ ხალხს დემოკრატიის განვითარებაში მივეხმაროთ. რატომ არ გვაქვს უფლება? არ შეიძლება ჩვენგან რამე ისწავლონ და ჩვენ დავაფინანსოთ ბრიტანეთში პოლიტიკური აქტივობები? რა ხდება, ქართულ ფულს რაიმე მანკი აქვს თუ წუნი? პირიქით, ჩვენ ვგონივართ ხარები. თურმე აქ ფული უნდა ხარჯონ და ხმაც არ უნდა ამოვიღოთ. ამ ყველაფრის მთელი უტიფრობა ის არის, რომ ფულს ხარჯავს, მაგრამ ამაზე რომ შენიშვნა უთხრა, კითხვა რომ დაუსვა, შეიცხადებენ და თავს შეურაცხყოფილად გრძნობენ, როგორც გუშინ შეურაცხყოფილად იგრძნო თავი ევროკავშირის ელჩმა, რომელიც საგარეო საქმეთა სამინისტროში იმყოფებოდა. როგორ თუ კითხვას სვამს ქართველი ხალხი, რაში ხარჯავთ ფულს და როგორ იშმუშნება ქართველი ხალხი, როცა დაიგებს, რომ პოლიტიკაში იხარჯება დანიელების ფული, რომელსაც საერთოდ ქართულ პოლიტიკაში არაფერი ესაქმება. საერთოდ, დანიამ რა იცის, ვინ ვართ იციან? დანიის მოსახლეობამ რომ რუკა აიღოს, გაიგებს საქართველო საერთოდ სად არის? ეს აჩვენებს იმ ფარისევლობას, რომელიც ყოველთვის იყო, ყოველთვის კარგად იფუთებოდა და დღეს ვერ იფუთება. მათ შორის ვერ იფუთება იმიტომ, რომ ჩვენ ბევრჯერ ვამხილეთ“, – განაცხადა შალვა პაპუაშვილმა.
მისი თქმით, „მართალი სიტყვა არის ხელისუფლების მთავარი იარაღი, რისიც ეშინიათ“.
„ამიტომ ცდილობენ ჩვენს დასჯას, დევნას, რომ გაგვაჩუმონ. ერთადერთი, რასაც ემსახურება ყველა განცხადება, რეზოლუცია, ვიზის შეზღუდვა თუ ასე შემდეგ, მთავარი მიზანი არის, როგორმე გაგვაჩუმონ. რასაც ჩვენ ვამბობთ ხოლმე, შემდეგ ამ სიმართლეს ვეღარ „იჭერენ“ და საბოლოოდ, ეს საკითხები სკდება. „დიფ სტეითი“ იქნება თუ სხვა საკითხები, ყველაფერი გაუსკდათ და ნაღმივით ხელში აუფეთქდათ,. რა ვქნათ, ერთი პატარა ქვეყანა ვართ, 3,9 მილიონი მოსახლეობით. არც გაქვს ბირთვული შეიარაღება და სხვაზე ზემოქმედების ეკონომიკური ინსტრუმენტები, მაგრამ ქართული სიტყვა ზოგჯერ ზოგიერთ სხვა ინსტრუმენტზე ძლიერია“, -განაცხადა პაპუაშვილმა.
