თუ დღეს სომხური ტვირთის ტრანსპორტირება საქართველოს გავლით ხდება, დადგება დღე და ეს დღე შორს არ არის, როცა სომხური ტვირთი პირდაპირ აზერბაიჯანის ტერიტორიაზე გაივლის.
ამის შესახებ აზერბაიჯანის პრეზიდენტ ილჰამ ალიევმა დავოსში, მსოფლიო ეკონომიკური ფორუმის ყოველწლიური შეხვედრის პანელურ დისკუსიაზე გამოსვლისას განაცხადა.
მისი თქმით, სომხეთმა აზერბაიჯანის გავლით რუსეთში ტვირთის ტრანზიტი მოითხოვა. ალიევის შეფასებით, დამოუკიდებლობის წლების განმავლობაში “ყველასთვის კარგად ცნობილი მიზეზების გამო” აზერბაიჯანს მეზობლებიდან მხოლოდ სომხეთთან არ ჰქონდა კარგი და მჭიდრო სამუშაო ურთიერთობა. თუმცა “დე ფაქტო მშვიდობის დამყარების შემდეგ” ორმა ქვეყანამ “ეკონომიკური თანამშრომლობა და საექსპორტო ოპერაციები დაიწყო.”
„ახლა კი სომხური მხარისგან მივიღეთ თხოვნა, რომ სომხეთიდან რუსეთში ტრანზიტი უზრუნველვყოთ. ამდენად, ჩვენ დერეფნები დე ფაქტოდ და ცალმხრივად გავხსენით. დიახ, ტრანსპორტირება გადის საქართველოზე, მაგრამ ერთ დღეს მარშრუტი, ასევე, სომხეთს გაივლის. დადგება დღე, როცა სომხური ტვირთი პირდაპირ აზერბაიჯანის ტერიტორიაზე გაივლის და ეს დღე შორს არ არის,“ – ამბობს ალიევი.
ცნობისთვის: სომხეთის ეკონომიკის სამინისტრო რუსეთიდან სომხეთში თხევადი ბუნებრივი აირის ტრანსპორტირებას საქართველოს და აზერბაიჯანის გავლით რკინიგზით განიხილავს. ამჟამად თხევადი ბუნებრივი აირის იმპორტი რუსეთიდან და ირანიდან ხდება, რაშიც ქვეყანა პრობლემებს აწყდება. კერძოდ, „ირანში გარკვეული პრობლემები ცნობილი გარემოებების გამო წარმოიშვა, ხოლო რუსეთის მიმართულებით პრობლემები ზემო ლარსზე შეფერხებებს უკავშირდება. ამის გამო სომხეთის ბაზარზე თხევადი ბუნებრივი აირის დეფიციტი გაჩნდა. სარკინიგზო ტრანზიტის აღდგენა შესაძლებელი გახდა აზერბაიჯანის მიერ სომხეთში სატვირთო გადაზიდვებზე შეზღუდვების მოხსნის გადაწყვეტილების შემდეგ. შესაბამისი შეთანხმება 2025 წლის ოქტომბერში რუსეთის, აზერბაიჯანისა და სომხეთის მთავრობების მონაწილეობით გაფორმდა.
