შინაგან საქმეთა მინისტრის მოადგილის, ალექსანდრე დარახველიძის განცხადებით, ავტოსაგზაო შემთხვევებისას გარდაცვალებისა და დაშავების მაჩვენებელში სიჩქარის გადაჭარბება პირველ ადგილზეა.
ამის შესახებ მან პარლამენტში ადამიანის უფლებათა დაცვის კომიტეტის სხდომაზე განაცხადა, სადაც საგზაო მოძრაობის წესების დარღვევისთვის არსებული ჯარიმების გაზრდის ინიციატივა წარადგინა.
„15კმ/სთ-დან – 40კმ/სთ-მდე სიჩქარის გადაჭარბებაზე 50-ლარიანი ჯარიმაა და აქ გვაქვს 1.5 მლნ-ზე მეტი ერთეული ჯარიმა. 40კმ/სთ-დან ზევით გადაჭარბება ისჯება 300-ლარიანი ჯარიმით, სადაც 150-200 ათასი ერთეული ჯარიმა გვაქვს ანუ სადაც მაღალია, ამ შემთხვევაში, ნაკლებია დარღვევები, სადაც დაბალია, ჯარიმა, იქ მეტია. ლოგიკა გვაქვს. ავარიებში გარდაცვალებისა და დაშავების მაჩვენებელში სიჩქარის გადაჭარბება არის პირველ ადგილზე. ჩვენ ანალიზს ვაკეთებთ უკვე მომხდარი ავარიის შემდეგ, იქ ხდება გაანალიზება რამ გამოიწვია ავარია. ერთ-ერთი პირველი არის სიჩქარის გადაჭარბება და მანევრირების წესის დარღვევა. უშუალოდ სიჩქარის ჩაშლა არ კეთდება, იქიდან გამომდინარე, რომ უკვე მომხდარი ავარიაა“, – განაცხადა დარახველიძემ.
