სოციალურ ქსელში ვრცელდება ვიდეო, სადაც ჩანს, რომ ერთ-ერთ მამაკაცს პოლიცია აკავებს, რა დროსაც მოქალაქე ცუდად გახდა.
ვიდეოს ავრცელებს თვითმხილველი თამარ ბოჭორიძე და აღნიშნავს, რომ კადრები ამაღლების ქუჩაზეა გადაღებული.
“ამ ყველაფრამდე ბიჭს ათრევდნენ საკუთარი მანქანიდან. ვინც გამოესარჩლა, ასე არ შეიძლება მოექცე ადამიანსო, ყველას შედგნენ.
ამაღლების ქუჩაზეა გადაღებული. რით დაიწყო ზუსტად არ ვიცი. მანქანიდან რომ ეჯაჯგურებოდნენ იმ ბიჭს, მაშინ ატყდა ხმაური. როგორც საუბრებიდან გაირკვა, ეს ბიჭი პარკინგიდან გამოდიოდა და გზა არ დაუთმო პატრულის მანქანას.სასწრაფოც მოვიდა უკვე”, – წერს თამარ ბოჭორიძე.
მოქალაქე, რომელიც შეუძლოდ გახდა, ახლა თავს კარგად გრძნობს. მის კომენტარს “ტვ პირველი” ავრცელებს
“დავინახე, რომ ზემოდან მოდიოდა პატარა მანქანა, უკან მოსდევდა პოლიცია, ასიგნალებდა, გამატარეო და ეს არ ატარებდა, მერე რა მოხდა, არ ვიცი, რადგან მე მეორე მხარეს გადავედი, მაღაზიაში შევედი, ცუდად ვიყავი ძალიან. ვუთხარი გამყიდველს, ცუდად ვარ-მეთქი და წყალი ან რამე მინდა-მეთქი, თავბრუ მეხვეოდა. გამოვედი იქიდან და გადმოვედი მერე მაღაზიაში უკან ისევ და დავინახე, რომ გზაზე ესენი დგანან და ერთი ახალგაზრდა ბიჭი, მეორე ბიჭს ეჭიდავება და ტენის მანქანაში.
მე ვუთხარი, ბიჭო რატომ ეჩხუბები-მეთქი. წყნარად უთხარი, კაცურად, შენ ეს დააშავე, შენ ასე ქენი, არ უნდა მაგას ჭიდაობა და წინააღმდეგობა თუ გაგიწია, მერე რაც გინდა ის უქენი-მეთქი.
შენ ვინ გეკითხებაო?
მე ვუთხარი, შვილო, მე კი არ მეკითხება, მე ხალხი ვარ-მეთქი და მოვა დრო და იგივე ხალხი, ასე ვინც იქცევით, ყოფას გიტირებთ-მეთქი, თქვენ, სუყველას.
როგორც კი ვუთხარი, ყოფას გიტირებო, შენო მე შემაგინეო. ყოფის ტირება ყოფილა თურმე საშინელი შეურაცხყოფა მერე დამავლეს ხელი და დამიწყეს ჭიდაობა. მტენიდა მანქანაში და გავხდი ცუდად, წავიქეცი, აღარ მახსოვს მერე, დატრიალდა ყველაფერი”, – ამბობს მოქალაქე.
