[აშშ-ს] ახალი ადმინისტრაციისგან ჩვენ მოველით მხოლოდ სწორი დასკვნების გამოტანას, თუ რამ გააფუჭა ეს ურთიერთობები. ყველაფერი ხელის გულზე დევს, არაფერს არც ახსნა და არც განმარტება არ სჭირდება, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისი განმარტებით, მთავრობა მზადაა აშშ-თან ურთიერთობები ახალი ფურცლიდან დაიწყოს.
„წინა ადმინისტრაციაზე ვამბობდი ხოლმე, რომ ურთიერთობების აღსადგენად თუ მოსაგვარებლად, მნიშვნელოვანი იყო, წინა ადმინისტრაციას საკუთარი გადაცდომები ეღიარებინა. ხშირად მითქვამს არამხოლოდ ამერიკის შეერთებული შტატების ადმინისტრაციის, არამედ სხვათა მიმართაც, რომ ბოდიში მოეხადათ ქართველი ხალხისთვის, იმისთვის, რაც ქართველ ხალხს წლების განმავლობაში ზოგიერთმა ორგანიზაციამ გაუკეთა, რომ საზოგადოება გაეთიშა და ძირი გამოეთხარა დემოკრატიისთვის. წინა ადმინისტრაციას რასაც ვსაყვედურობდით, მოქმედმა ადმინისტრაციამ დაადასტურა, იმ დონეზე დაადასტურა, რომ წინა პრეზიდენტს, სახელმწიფო მდივანს და სხვა მაღალი თანამდებობის პირებს სანქციები დაადო და შეუწყვიტა წვდომა ინფორმაციაზე, რომელზეც ყოფილი თანამდებობის პირებს წვდომა აქვთ ხოლმე. დაასანქცირა – ბაიდენი, ბლინკენი და სხვა ყოფილი მაღალჩინოსნები. ახალი ადმინისტრაციისგან ჩვენ მოველით მხოლოდ სწორი დასკვნების გამოტანას, თუ რამ გააფუჭა ეს ურთიერთობები, ხელის გულზე დევს ყველაფერი, არაფერს არც ახსნა და არც განმარტება სჭირდება, თავად ახალი ადმინისტრაციის მიერ დადასტურებული არის, თუ რას სჩადიოდა საქართველოს წინააღმდეგ ამერიკის ხალხის ფულის გამოყენებით ზოგიერთი ორგანიზაცია, ამას ახლა უბრალოდ სწორი დასკვნის გამოტანა სჭირდება.
გუშინ ჩვენ მოვისმინეთ ამერიკის პრეზიდენტის გადაწყვეტილება ტარიფებთან დაკავშირებით და დიდი ქვეყნების რეაქციები ვნახეთ, რომელთაც დიდად შეწინააღმდეგების შესაძლებლობა არ აქვთ. ჩვენ ჩვენი პოლიტიკური წუნიდან თუ ზომიდან გამომდინარე, ამ ურთიერთობების გადატვირთვის საკითხზე დიდი გავლენა არ გვაქვს. ჩვენ მზაობას ვაცხადებთ, რომ ურთიერთობები ახალი ფურცლიდან დაიწყოს და დაემყაროს ნამდვილ, თანასწორ, ერთმანეთის სუვერენიტეტის პატივისცემაზე დაფუძნებულ სტრატეგიულ ურთიერთობას და არა ისეთს, როგორსაც სამწუხაროდ, წინა ადმინისტრაცია უყურებდა საქართველოს, როგორც დაბალ ღობეს და ზოგიერთი ქვეყანა დღესაც ასე განგვიხილავს, როგორც ვატყობთ. მოველით, რომ შესაბამისი დასკვნები იქნება გამოტანილი წარსულიდან, თუ რამ გააფუჭა ეს ურთიერთობები“, – განაცხადა პაპუაშვილმა.
მისივე თქმით, გაუგებარია, მიღებულ ახალ კანონებთან დაკავშირებით როგორ საუბრობენ უცხოელი პარტნიორები იმის ფონზე, როცა ეს კანონები ჯერ ინგლისურ ენაზე ნათარგმნი არაა.
„ძალიან საინტერესოა ეს განცხადებები, რომელიც ბრიუსელიდან, თუ სხვა უწყებებიდან ვიხილეთ. ამ დღეებში, რამდენიმე საელჩომ მოიკითხა
ეს კანონები ინგლისურად გვაქვს თუ არა, ნათარგმნი არ არის ინგლისურად, თუ ინგლისურად არ აქვთ, საერთოდ რა დასკვნები გამოაქვთ საერთოდ ამ კანონთან დაკავშირებით? როგორც ჩანს, ინგლისურადაც არ აქვთ კანონი, მაგრამ დასკვნები გამოაქვთ სწორი. სამწუხაროა, რომ ასეთი წინმსწრები და არაკვალიფიციური აზრი გვესმის სხვადასხვა საკითხთან დაკავშირებით. ჩვენ ეს არ გვაქვს ნათარგმნი. აქედან გამომდინარე, რა ენაზე კითხულობენ, რა დასკვნები გამოაქვთ ბრიუსელში და სხვაგან, არ ვიცი, როგორც ჩანს, კვლავაც NGO-ების განცხადებებს ეყრდნობიან, რომლებიც პირდაპირ, ღიად, დეზინფორმაციით და პროპაგანდით არიან დაკავებული“, – განაცხადა პაპუაშვილმა.
