ქუთაისი საქართველოს დამოუკიდებლობისთვის – დღეს აქცია გაიმართება. მოქალაქეები უწყვეტი პროტესტის უცვლელ ადგილას, მერიის წინ 19:00 საათიდან შეიკრიბებიან.
,,1991 წლის 31 მარტს, სარეფერენდუმო კითხვაზე
„თანახმა ხართ თუ არა აღდგეს საქართველოს სახელმწიფოებრივი დამოუკიდებლობა 1918 წლის 26 მაისის დამოუკიდებლობის აქტის საფუძველზე?“
ქართველმა ხალხმა ერთსულოვნად გასცა ისტორიული პასუხი – დიახ!
რეფერენდუმი ჩატარდა საქართველოს მთელ ტერიტორიაზე, მათ შორის აფხაზეთსა და ცხინვალის რეგიონში.
31 მარტის რეფერენდუმის შედეგის საფუძველზე უზენაესმა საბჭომ 1991 წლის 9 აპრილს საქართველოს დამოუკიდებლობის აღდგენის აქტი მიიღო.
რეფერენდუმში მონაწილეთა 99%-მა უარი თქვა იმპერიალისტურ ბორკილებზე და მტკიცედ განაცხადა საქართველოს და ქართველი ხალხის ურყევი ნება – არასდროს დაბრუნდეს საქართველო საბჭოთა წყობილებაში.
სწორედ ამიტომ, 31 მარტი ქართველების ეროვნული დღესასწაულია.
ამავდროულად, ქართველი ხალხის ისტორიული მონაპოვრის დაცვა დღეს ჩვენი მოვალეობაა. განსაკუთრებით ახლა, როცა ჩვენი ისტორიული არჩევანი საქართველოს არალეგიტიმური ხელისუფლების პირობებში მუდმივად საფრთხის ქვეშაა.
31 მარტს, 19:00 სთ.-დან ვიკრიბებით ქ. ქუთაისის მერიის წინ (პროტესტის ჩვეულ ადგილას) 31 მარტის მონაპოვრის, ქართველი ხალხის ღირსების, ჩვენი იდენტობისა და ისტორიული არჩევანის დასაცავად.
31 მარტი საქართველოს პირველი პრეზიდენტის – ზვიად გამსახურდიას, დაბადების დღეა, რომელსაც საქართველოს დამოუკიდებლობის აღდგენაში განსაკუთრებული როლი აქვს.” – ნათქვამია გავრცელებულ ინფორმაციაში.
უწყვეტი საპროტესტო აქციები საქართველოს მასშტაბით 28 ნოემბრიდან იმართება, მას შემდეგ რაც ირაკლჯ კობახიძემ განაცხადა რომ, საქართბელო ევროკავშირთან მოლაპარაკებების ფანჯარას 2028 წლამდე ხურავს.
აქციების დასაწყისში დემონსტრანტების დასაშლელად პოლიცია იყენებდა წყლის ჭავლსა და ცრემლსადენ გაზს. აქციებზე არაერთ მოქალაქესა და მედიის წარმომადგენელს სასტიკად გაუსწორდნენ. დააკავეს ასობით ადამიანი, მათ შორის, 50-ზე მეტი პირის მიმართ სისხლის სამართლებრივი დევნა დაიწყო. ამ დრომდე იდენტიფიცირებული და დაკავებული არ არის არცერთი სამართალდამცველი, რომელმაც აქციების დროს ძალას გადაამეტა.
