გრემი 2025-ის გამარჯვებულები ცნობილია. დაჯილდოების რიგით 67-ე ცერემონია ლოს-ანჯელესში დასრულდა – ცერემონიას ტრადიციულად კრიპტო-არენამ უმასპინძლა.
წელს გრემის დაჯილდოება განსაკუთრებული მისიის მატარებელი იყო. ის ლოს-ანჯელესში ხანძრისგან დაზარალებულთა დასახმარებლად თანხების შეგროვებას და პირველად დახმარებაში ჩართული გმირ მეხანძრე-მაშველებს მიეძღვნა. ცერემონიაც სწორედ ამ სიტყვებით გახსნეს – „ლოს-ანჯელესის ხანძრები ლოკალიზებულია“.
წელს, როგორც მოსალოდნელი იყო, ყველაზე მეტი ნომინაციით ბიონსე ლიდერობდა. მისი ალბომი, სახელწოდებით „კოვბოი კარტერ“ 11 კატეგორიაში წარადგინეს. აღსანიშნავია, რომ ნომინაციების ამ რაოდენობით ბიონსემ ახალი რეკორდი დაამყარა. გრემის დაჯილდოების ისტორიაში ის პირველი ადამიანი გახდა, რომელიც 99-ჯერ წარადგინეს სხვადასხვა კატეგორიაში. ამ მხრივ, ბიონსემ საკუთარი ქმრის, Jay-Z-ს რეკორდი გააუმჯობესა, რომელიც გრემზე 88-ჯერ ყოფილა ნომინირებული. ის წლევანდელ გრემიზე, 50 წლის შემდეგ პირველად – პირველი აფრო ამერიკელი შემსრულებელი გახდა, რომელმაც ქანთრი ალბომის კატეგორიაში გაიმარჯვა. (ის ამ კატეგორიაში პირველად იყო წარდგენილი)
ბიონსეს შემდეგ 7-7 ნომინაციით ლიდერობდნენ ბილი აილიში, კენდრიკ ლამარი და Post Malone. ხოლო 6-6-ით – ტეილორ სვიფტი, ჩაპელ რონი და საბრინა კარპენტერი.
წელს საუკეთესო როკ-პერფორმანსისთვის გრემი აიღო ლეგენდარულმა მუსიკალურმა ჯგუფმა – The Beatles-მა სიმღერისთვის Now And Then, რომელიც ჯონ ლენონის დაუსრულებელი ნამუშევარია და ის გასულ წელს ხელოვნური ინტელექტის დახმარებით დაასრულეს.
წლევანდელი გრემის ცერემონია გამორჩეული იყო იმითაც, რომ 2022 წელს ოსკარზე მომხდარი ინციდენტის შემდეგ, ასეთი მასშტაბის ღონისძიებაზე პირველად ვიხილეთ უილ სმიტი.
სცენაზე ვიხილეთ weekend, რომელიც ასევე ერთ დროს გრემის დიდი კრიტიკოსი იყო. 2020 წელს მან ამერიკის ხმის ჩამწერ სტუდიას კორუმპირებული უწოდა. მოულოდნელი იყო გრემის სცენაზე დაიანა როსის ხილვაც.. რომელმაც გამარჯვებული დიდი ოთხეულის ერთ-ერთ მთავარ კატეგორიაში წლის საუკეთესო სიმღერა გამოაცხადა.
გრემის დაჯილდოების ცერემონიის წამყვანი უკვე მეხუთედ კომიკოსი და მსახიობი, ტრევორ ნოა გახლდათ.
გრემის ცერემონიაზე პატივი მიაგეს იმ ადამიანებს, რომლებიც მუსიკალურმა ინდუსტრიამ გასულ წელს დაკარგა. ასევე გრემის დაჯილდოების სცენაზე საზოგადოებამ იხილა ისეთი შემსრულებლები, როგორებიც ბილი აილიში, საბრინა კარპენტერი, ლედი გაგა, ბრუნო მარსი და შაკირა არიან.
გრემის ყველაზე მნიშვნელოვანი ნომინაცები ე.წ. დიდი ოთხეული გახლავთ.. ესენი წლის საუკეთესო ჩანაწერი, საუკეთესო ალბომი, საუკეთესო სიმღერა, საუკეთესო ახალი შემსრულებელი.. სწორედ ამ კატეგორიების გამოცხადებას ელოდება ხოლმე ყველაზე მეტად მსოფლიო.
წლის საუკეთესო ჩანაწერი – გრემი გადაეცა კენდრიკ ლამარს ნამუშევრისთვის Not Like Us.
წლის საუკეთესო სიმღერა – გრემი გადაეცა კენდრიკ ლამარს ასევე ნამუშევრისთვის – Not Like Us.
წლის საუკეთესო ალბომის კატეგორიაში გამარჯვებული ბიონსე გახდა. მიუხედავად იმისა, რომ ბიონსე გრემის ისტორიაში ყველაზე მეტი ჯილდოს მფლობელი არტისტია, მას აქამდე არასდროს მოუგია დიდი ოთხეულის ეს კატეგორია. ის წლის საუკეთესო ალბომის ნომინაციაში აქამდე 4-ჯერ იყო ნომინირებული და ოთხივეჯერ დამარცხდა. თუმცა, წლევანდელი გრემი გამორჩეულია. როგორც იქცა, ბიონსე წლის საუკეთესო ალბომის ჯილდოს მფლობელი გახდა… გულშემატკივრების მოლოდინი, რომ Cowboy Carter ის პროექტი აღმოჩნდებოდა, რომელიც ბიონსეს ამ ნომინაციას მოუტანდა, გამართლდა.
წლის საუკეთესო ახალი შემსრულებლის ტიტული კი ამერიკელმა ახალბედა შემსრულებელმა, ჩაპელ როანმა დაიმსახურა. გასულ წელს ეს ჯილდო ვიქტორია მონეს ერგო და აღსანიშნავია, რომ სწორედ ვიქტორიამ გადასცა გრემი წელს ჩაპელ როანს.
